Biełaruski vajenny ekspert Alaksandar Alesin upeŭnieny, što niama padstaŭ ličyć, što farmavańnie motastrałkovaj dyvizii pad Smalenskam — heta padrychtoŭka rasiejskaj ahresii suprać Biełarusi.
Jak paviedamlajuć siońnia rasiejskija ŚMI sa spasyłkaj na Hienštab, motastrałkovaja dyvizija, jakaja ŭvojdzie ŭ skład 1-j hvardziejskaj tankavaj armii Ŭzbrojenych sił Rasiei, budzie razhornutaja pad Smalenskam u Jelni ŭ siaredzinie nastupnaha hodu. Planujecca, što ŭ skład dyvizii ŭvojduć 10 tysiač čałaviek.
«Ci heta suprać Biełarusi? Uličvajučy kolkaść uzbrojenych sił, jakija ciapier skancentravanyja na zachodnim napramku Rasiei, možna skazać, što heta hrupoŭka nia maje nastupalnaha charaktaru. Jana maje abarončy charaktar i pa kanfihuracyi, i pa kolkaści. Tamu heta pytańnie treba źniać», — ličyć Alaksandar Alesin.
I ŭsio ž nielha skazać, što razhortvańnie Jelenskaj motastrałkovaj dyvizii zusim nia źviazana ź Biełaruśsiu.
«Takim čynam farmujecca druhi ešalon rasiejskaj abarony suprać NATO. Na vypadak kali nie vytrymaje pieršy — kali biełaruskaja armija nie strymaje praciŭnika. Heta adlustroŭvaje niekatoraje astudžeńnie adnosinaŭ tamu što Rasiei padobna skieptyčna stavicca da taho, što Biełaruś moža zatrymać novuju hrupoŭku NATO, jakaja ciapier farmujecca ŭ krainach Bałtyi i Polščy. Chacia takaja sytuacyja (vajna pamiž NATO i Rasiejaj — RS) vyklučna hipatetyčnaja i nivodny bok nie zacikaŭleny ŭ vajennym kanflikcie. Ale rasiejcy jaŭna rychtujucca da dalejšaha abvastreńnia. Kali samit u Varšavie pastanović na pastajannaj asnovie raźmiaścić u Polščy bazy NATO i dadatkovy kantynhient u krainach Bałtyi, to možna čakać, što i na zachodnich miežach Rasiei (to bok na ŭschodnich miežach Biełarusi) źjaviacca jašče niejkija padraździaleńni. Heta sychodzić ź lohiki supraćstajańnia», — padkreślivaje ekspert.
Takim čynam, adznačaje Alesin, moža iści havorka ab peŭnym niedaviery z boku Rasiei da abaronnych zdolnaściej Biełarusi.
«Heta svajho rodu «fe». Biełaruś nie zachacieła raźmiaščać na svajoj terytoryi rasiejskija vajennyja bazy, tamu heta taki žest niedavieru: maŭlaŭ, nia chočacie na vašaj terytoryi, my raźmieścim na svaich zachodnich miežach», — miarkuje ekspert.
