U Centralnym rajonie Minska zarehistravanaja inicyjatyŭnaja hrupa śpiavački Iryny Darafiejevaj.
Zasłužanaja artystka Biełarusi raźličvaje stać deputatam parłamienta, kab źmianić svajo žyćcio i žyćcio biełaruskaha naroda. «Chočacca niešta źmianić u svaim žyćci, u žyćci krainy i našych ludziej. Pra kankretnyja prapanovy kazać rana. Spačatku treba sabrać podpisy, a dalej — aktyŭna prapracoŭvać svaju prahramu», — zajaviła Darafiejeva 5 lipienia padčas zboru podpisaŭ kala minskaha HUMa.
Kiraŭnik jaje inicyjatyŭnaj hrupy — rektar Biełaruskaha dziaržaŭnaha ŭniviersiteta kultury i mastactvaŭ Juryj Bondar. Darafiejeva vykładaje va ŭniviersitecie vakał, a taksama ŭznačalvaje kafiedru estradnaha majsterstva. Rektar pierakanany, što jana budzie dobrym deputatam i zdoleje adstojvać intaresy rabotnikaŭ kultury.
«Iryna — čałaviek sa stryžniem, moža damahacca svajho, — zajaviŭ jon. — Kali jana zadasca metaj, to zrobić usio jak deputat, kab źmianić situacyju z zarpłatami ŭ śfiery kultury. Ale rabotnikam kultury taksama treba varušycca — uzrovień zarobkaŭ rozny. Chtości skardzicca, što ŭ maładych śpiecyjalistaŭ zarpłata 2,8 miljona rubloŭ, ale ŭ našym univiersitecie małady śpiecyjalist atrymlivaje nie mienš za 4 miljony rubloŭ. Usio zaležyć jašče i ad kiraŭnictva i pravilnaha mieniedžmientu».
Sama Darafiejeva tak kamientuje situacyju z zarpłatami ŭ śfiery kultury: «Vielmi pravilna skazaŭ prezident na apošnim Usiebiełaruskim schodzie pra toje, što treba našym rabotnikam kultury bolš vykazvać inicyjatyvu, zajmacca inavacyjnymi prajektami».
Na pytańnie, čamu zorki biełaruskaha šou-biźniesu słaba iduć u palityku, Darafiejeva adkazała: «Mahčyma, jany nie adčuvajuć u sabie siły». «Kožny čałaviek robić vybar u žyćci, adšturchoŭvajučysia ad paklikańnia. U mianie atrymałasia być vykładčykam, być kiraŭnikom, i ja vyrašyła pasprabavać niešta novaje. Spadziajusia, što, źjaŭlajučysia deputatam, zmahu praciahvać vykładać va ŭniviersitecie i praciahnu kancertnuju dziejnaść», — skazała śpiavačka.
U Centralnym rajonie stalicy arhanizavanyja vosiem pikietaŭ Darafiejevaj. U jaje inicyjatyŭnuju hrupu ŭvachodziać amal 100 čałaviek, u asnoŭnym studenty i vypuskniki ŭniviersiteta kultury i mastactvaŭ. Jany ž źbirajuć podpisy za vyłučeńnie svajho vykładčyka. Na pikietach raźmieščanyja płakaty z partretam śpiavački, a taksama ściahi Fiederacyi prafsajuzaŭ Biełarusi.
