U reanimacyi balnicy chutkaj mieddapamohi Minska znachodziacca čaćviora pacyjentaŭ, paciarpiełych u vyniku bury 13 lipienia, paviedamiŭ namieśnik hałoŭnaha ŭrača balnicy pa miedycynskaj častcy Barys Piskun.
Pavodle jaho słoŭ, usiaho ŭ balnicu źviarnulisia 17 čałaviek, piaciora špitalizavanyja. Ź ich čaćviarym zroblenyja apieracyi. Tak, apieracyja spatrebiłasia mužčynu z tupoj traŭmaj brušnoj i hrudnoj połaści, razryvam salnika. Jaho stan zaraz stabilny.
Apieracyja taksama spatrebiłasia pacyjentu z razryvam piečani. Jon byŭ traŭmavany kavałkam dreva, što zvaliŭsia na jaho. Stan jaho taksama stabilny.
Piskun adznačyŭ, što pacyjenty časta atrymlivajuć surjoznyja zakrytyja traŭmy brušnoj połaści.
Naprykład ad udaru ŭ žyvot, u vyniku jakoha nie zastajecca navat siniaka, razryvajecca sielazionka. Takim čynam, skazaŭ Piskun, praciah boli ŭ žyvacie źjaŭlajecca abaviazkovaj padstavaj dla zvarotu da ŭrača dla vyklučeńnia paškodžańniaŭ orhanaŭ brušnoj połaści.
Ciažkuju traŭmu z paškodžańniem škileta tvaru atrymaŭ mužčyna, jakoha dastavili ź miesca pracy. «Mužčynu pryvioz prarab z budoŭli. Kavałak šyfieru trapiŭ pacyjentu ŭ tvar. Jon pastupiŭ u apieracyjnuju biez rehistracyi ŭ pryjomnym pakoi. U jaho surjoznyja paškodžańni škileta tvaru. Ciapier stan kampiensavany, jon znachodzicca na aparacie štučnaha dychańnia ŭ stanie miedykamientoznaha snu. Heta budzie doŭžycca minimum čaćviora sutak i ŭ liku inšaha pazbavić pacyjenta ad bolu i ŭskładnieńniaŭ», — skazaŭ urač.
Jašče ŭ adnaho pacyjenta, jaki atrymaŭ pierałom halonkastupniovaha sustava, miedyki padazravali taksama traŭmu ŭnutranych orhanaŭ. Jaje vyklučyli paśla praviadzieńnia dyjahnastyčnaha małainvaziŭnaha ŭmiašańnia. Hetaha pacyjenta 14 lipienia płanujecca pieravieści z reanimacyi.
U balnicu špitalizavanyja pacyjenty ź mienš ciažkimi traŭmami. Naprykład dziaŭčyna, na jakuju ŭpaŭ dach altanki. U jaje lohkaja traŭma hałavy.
Piskun adznačyŭ, što padčas urahanu, bury, rezkaha ŭzmacnieńnia vietru nieabchodna pierš za ŭsio šukać schovišča.
«Nielha zastavacca na adkrytaj prastory, nieabchodna šukać najbližejšaje schovišča, pryčym nie kala dreva abo truchlavaj chatki, a zajści, naprykład, u budynak kramy. U vypadku kali vy atrymali choć niejkuju traŭmu, dla vyklučeńnia uskładnieńniaŭ nieabchodna źviarnucca pa miedycynskuju dapamohu», — skazaŭ Piskun.
Jon adznačyŭ, što ŭsie hramadzianie Biełarusi ŭ vypadku nieabchodnaści mohuć źviartacca pa miedycynskuju dapamohu ŭ lubuju ŭstanovu achovy zdaroŭja krainy. «Siarod paciarpiełych u vyniku ŭrahanu pacyjentaŭ, jakija da nas źviarnulisia, — skazaŭ urač, — byli žychary roznych rehijonaŭ Biełarusi i navat zamiežnyja hramadzianie. Bryhady chutkaj dapamohi dastavili siem čałaviek, dvoje pryjechali pa nakiravańni paliklinik, vosiem źviarnulisia samastojna».
