U studzieni—mai ŭ vyniku źnižeńnia suśvietnych cen na syravinnyja tavary biełaruski naftavy i kalijny ekspart skaraciŭsia bolš jak na 1,5 młrd. dołaraŭ. Jak śviedčać źviestki aficyjnaj statystyki, ekspart kalijnych uhnajeńniaŭ u studzieni—mai skłaŭ 727,9 młn. dołaraŭ i źniziŭsia na 37,5% (na 436,2 młn. dołaraŭ) u hrašovym vyražeńni i na 21,9% — u fizičnym.
Ekspart biełaruskich naftapraduktaŭ u studzieni—mai 2016 hoda skłaŭsia na ŭzroŭni 2 młrd. dołaraŭ i źniziŭsia ŭ hrašovym vyražeńni ŭ paraŭnańni z anałahičnym pieryjadam minułaha hoda na 1,1 młrd. dołaraŭ (na 35,2%). Pry hetym u naturalnym vyražeńni abjom ekspartu praktyčna nie źmianiŭsia — 7,6 młn. ton.
Takim čynam, z-za źnižeńnia suśvietnych cen na kalijnyja ŭhnajeńni i naftapradukty biełaruski ekspart u studzieni—mai źniziŭsia bolš jak na 1,5 młrd. dołaraŭ.
Pry hetym varta adznačyć, što ŭ pieršym kvartale Biełaruś niedaatrymała amal 100 młn. dołaraŭ ad ekspartu ŭłasnaj nafty. Tak, u studzieni—mai ekspart biełaruskaj nafty ŭ Hiermaniju skłaŭ 673 tys. ton na 167,9 młn. dołaraŭ. U fizičnym vyražeńni ekspart biełaruskaj nafty ŭ paraŭnańni sa studzieniem—majem minułaha hoda nie źmianiŭsia, u vartasnym — skaraciŭsia na 36,7%.
Jak paviedamlałasia raniej, tavarny ekspart Biełarusi ŭ studzieni—mai skłaŭ 8,9 młrd. dołaraŭ i źniziŭsia ŭ paraŭnańni z takim ža letašnim pieryjadam na 19,2%, abo na 2,1 młrd. dołaraŭ. Takim čynam, uniosak troch zhadanych tavaraŭ (naftapraduktaŭ, kalijnych uhnajeńniaŭ i nafty) u źnižeńnie biełaruskaha ekspartu ŭ studzieni—mai skłaŭ 77%.
Ministr zamiežnych spraŭ Biełarusi Uładzimir Makiej vykazaŭ niezadavalnieńnie dynamikaj biełaruskaha ekspartu ŭ hetym hodzie. «Adrazu adznaču, što dynamika pa eksparcie za piać miesiacaŭ 2016 hoda nie moža radavać — zadańnie na 2016 hod nie vykonvajecca», — zajaviŭ jon 13 lipienia na pracoŭnaj naradzie kiraŭnikoŭ biełaruskich dypłamatyčnych i konsulskich słužbaŭ z členami ŭrada. Kiraŭnik źniešniepalityčnaha viedamstva padkreśliŭ, što ŭ studzieni—mai zadańnie pa naroščvańni ekspartu vykanali tolki 15 z 59 biełaruskich zamiežnych ustanoŭ.
