Biełaruski bok 18 lipienia nakiravaŭ u Mižnarodny arbitražny sud u Łazanie (Šviejcaryja) pazoŭ u suviazi z rašeńniem vykankama Mižnarodnaj fiederacyi kanoe (ICF) adchilić na hod ad spabornictvaŭ mužčynskuju zbornuju, uklučajučy trenieraŭ, miedycynski i absłuhoŭvajučy piersanał.
Pra heta paviedamiŭ pieršy vice-prezident Nacyjanalnaha alimpijskaha kamiteta, pamočnik prezidenta pa pytańniach fizičnaj kultury, sportu i raźvićcia turyzmu Maksim Ryžankoŭ na pres-kanfierencyi ŭ paniadziełak.
«Jość nadzieja schilić sud vynieści adzin z dvuch vierdyktaŭ, kab atlety paśpieli na Alimpijadu ŭ Rya-de-Žaniejra: dazvolić paskoranuju praceduru razhladu spravy ci prypynić vykanańnie rašeńnia ICF da rašeńnia arbitražnaha suda», — skazaŭ Ryžankoŭ.
«Nas adolvaje rasčaravańnie i hłybokaje abureńnie, choć my vielmi sabranyja i zasiarodžanyja ŭ adstojvańni intaresaŭ našych atletaŭ», — zajaviŭ čynoŭnik. Jon nahadaŭ, što niadaŭna vyłučalisia pretenzii ajčynnym štanhistam, ale «zhodna z dadatkovymi rašeńniami našy atlety buduć vystupać na Alimpijadzie ŭ Rya i siońnia buduć ekipijavanyja».
Pavodle słoŭ Ryžankova, pieršapačatkova płanavałasia čatyrochhadovaja dyskvalifikacyja, jakaja zakranuła b i nacyjanalnuju fiederacyju, a heta aznačała b adchileńnie ad Alimpijady-2016 i žanočaj zbornaj pa viesłavańni na bajdarkach i kanoe.
U sprobie paźbiehnuć sankcyj na pasiadžeńnie vykankama mižnarodnaj fiederacyi, jakoje doŭžyłasia try dni, vyjechała biełaruskaja delehacyja, jakaja pradstaviła svaje arhumienty.
Rašeńnie ab adchileńni mužčynskaj zbornaj na hod pastupiła ŭ noč na 16 lipienia. Padstavaj stali vyniki vobysku, praviedzienaha 12 krasavika hetaha hoda francuzskaj palicyjaj u raźmiaščeńni kamandy, jakaja pravodziła ŭ horadzie Tampl-siur-Ło vučebna-trenirovačny zbor. Na dumku biełaruskaha boku, vykankam ICF śviadoma zaciahvaŭ vyniasieńnie rašeńnia, viedajučy, što termin aficyjnaj zajaŭki dla ŭdziełu ŭ AH-2016 minaje 18 lipienia i času na abskardžańnie rašeńnia budzie mała.
