Fond «Kraina zamkaŭ» pačynaje kampaniju pa zbory srodkaŭ na zakupku dadatkovych 3D-drukarak dla drukavańnia madelaŭ zamkaŭ i chramaŭ Vialikaha Kniastva Litoŭskaha. Hetyja madeli buduć źmieščany ŭ parku minijaciur u Rodzievičach, što za 5 kiłamietraŭ ad Halšanskaha zamka. 20 lipienia zaklik da zboru 11 016 rubloŭ źmieściŭ na kraŭdfandynhavaj placoŭcy Talaka.by dyrektar fonda Aleś Varykiš. Achviaravać hrošy možna pa spasyłcy.
«Da 31 kastryčnika my pavinny adčynić pieršuju čarhu parku minijaciur. Tut buduć źmieščany dziesiać madelaŭ zamkaŭ i chramaŭ Vialikaha Kniastva Litoŭskaha, — raspaviadaje Aleś Varykiš. — Na sioniašni dzień my ŭžo zrabili Kamianieckuju viežu. Zaraz my budziem jaje kleić, farbavać i vystavim u parku».
Pa słovach dyrektara fonda «Kraina zamkaŭ», u dadzieny momant drukujecca makiet carkvy-krepaści ŭ Muravancy. Na čarzie — chramy-krepaści ŭ Synkavičach, Kamajach, zamki ŭ Krevie, Lidzie, Lubčy. Madeli drukujucca tolki na adnoj drukarcy. «Drukavańnie prasoŭvajecca vielmi marudna. Heta źviazana z mahčymaściami drukarki. Tamu my vyrašyli raspačać kraŭdfandynhavuju kampaniju i sabrać srodki na dźvie dadatkovyja 3D-drukarki. Heta značna paskoryć praces», — patłumačyŭ Aleś Varykiš.
Pa jaho słovach, košt kožnaj drukarki składaje kala 2,5 tys. dalaraŭ. Pry hetym ich mahčymaści buduć pieravyšać mahčymaści abstalavańnia, jakoje ŭžo jość. Tak, dla vyrabu viežy ŭ Kamiancy treba było nadrukavać 36 asobnych błokaŭ. Novyja drukarki dazvolać adlić tuju ž viežu z 12 častak. A heta ekanomija i času, i materyjałaŭ.
Dla achviaradaŭcaŭ fond «Kraina zamkaŭ» raspracavaŭ cełuju sistemu padarunkaŭ i źnižak. Tak, naprykład, achviaravaŭšy 20 rubloŭ, čałaviek atrymaje mahčymaść biaspłatna naviedvać park minijaciur na praciahu adnaho hoda i źnižki na ekskursii fondu. Kali achviaravańnie budzie składać 50 rubloŭ i vyšej, imia achviaradaŭcy budzie zapisana na hanarovaj došcy, a pry sumie ad 100 rubloŭ akramia roznych źnižak achviaradaŭca atrymaje ŭ padarunak minijaciuru adnaho z zamkaŭ.
Nahadajem, inicyjatyva stvareńnia parku minijaciur była ahučana kiraŭnikom fonda «Kraina zamkaŭ» naprykancy minułaha hoda. Hetaja ideja ŭžo była padtrymanaja ŭ miežach prajekta JEZ/PRAAN «sadziejničańnie raźvićciu na miascovym uzroŭni ŭ Respublicy Biełaruś». Na sioniašni dzień inviestycyi ŭ abjekt užo skłali kala 300 miljonaŭ niedenaminavanych rubloŭ. Na hetyja srodki terytoryja parku całkam ačyščana ad kamieńnia i śmiećcia, spłanavana i zasiejana travoj. Dla stvareńnia makietaŭ zamkaŭ i cerkvaŭ Vialikaha Kniastva da prajektu pryciahnuty prafiesijnyja architektary, 3D-dyzajniery i mastaki.
Telefony dla suviazi
Aleś Varykiš +375 296 54 64 84 (Vełk)
Ihar Stankievič +375 298 65 63 24 (MTS)
