UCVHD (Usierasijski centr vyvučeńnia hramadskaj dumki) u adkaz na fłešmob «#Janiebajusiaskazać» apublikavaŭ daśledavańnie, pavodle jakoha 73% rasijan, a taksama ich blizkija, nikoli nie sutykalisia z hvałtam — seksualnym, maralnym ci fizičnym. Vyniki apytańnia śviedčać, što pakutavali ad takoha hvałtu tolki 10%.
Akramia taho, 39% respandentaŭ upeŭnienyja: pra takija vypadki lepš nikomu nie raspaviadać, u tym liku nie źviartacca ŭ palicyju. Zrešty, bolš za pałovu apytanych (54%) usio roŭna daviarajuć pravaachoŭnym orhanam. I ŭsiaho niekalki pracentaŭ achviar hatovyja padzialicca svajoj historyjaj ź psichołahami, śviatarami (3-4%). Blizkim ludziam daviarajuć bolš — pra toje, što zdaryłasia, im hatovyja raspavieści 18% paciarpiełych.
Pra fłešmob, pavodle dadzienych UCDHM, u pieršy raz pačuli 81% čałaviek, a viedali pra jaho ŭsiaho 4%, choć ščyryja pryznańni mužčyn i žančyn, jakija sutyknulisia z hvałtam, u sacyjalnych sietkach vyklikali šyroki rezanans u internecie. Suzasnavalnik prajekta «Nasiliju.niet» Hanna Ryvina ŭpeŭnienaja, što apytańnie UCDHM — adkaz na tuju chvalu, jakuju padniaŭ fłešmob.
«Hramadstva temu tabuiruje, a ŭsie hetyja 73% prosta mohuć nie razumieć, što takoje hvałt, što jon zvyčajna byvaje ŭ siamji, — skazała ekśpiert. — Ale ŭłady nie reahujuć na hety praces. Kali fłešmob pačaŭ raspaŭsiudžvacca, u šerahu ŚMI adrazu ž pačałasia kampanija: psichołahi, palitołahi razvažali, jak škodna dzialicca svaimi prablemami. Ale pryznańni žančyn kažuć pra inšaje — jany hadami maŭčali, ale nie zabylisia».
Fłešmob «Ja nie bajusia skazać» pačała ŭkrainka Nastaśsia Mielničenka, jaje amal adrazu padtrymaŭ rasijski siehmient internetu. Usiaho praź niekalki hadzin achviary hvałtu pačali publična raspaviadać svaje historyi. Mnohija ź ich byli šakavalnymi i raspaviadalisia ŭpieršyniu.
Mužčyny reahavali na hetyja pryznańni ŭ asnoŭnym tryma sposabami — adny raspaviali, jak damahalisia ich, druhija — pieraprašali, navat kali sami nikoli nie byli ahresarami, trecija pisali, što žančyny sami pavinny ŭmieć aceńvać ryzyki i paźbiahać situacyj, u jakich mohuć stać achviarami hvałtu. Tym nie mienš, kanstatavała ŭ pačatku lipienia jurystka Mary Daŭcian (jana śpiecyjalizujecca na dapamozie žančynam), dziakujučy fłešmobu «źmianiajecca hramadskaje ŭsprymańnie prablemy».
