Dziaržpamiežkamitet apublikavaŭ statystyku za pieršaje paŭhodździe. U viedamstvie adznačajuć, što ŭ apošni čas nazirajecca novaja tendencyja: «čaŭnočny vyjezd» staŭ mienš intensiŭnym, pajezdki za miažu mianiajuć charaktar z tavarnaha na turystyčny.
Reuters
Za šeść miesiacaŭ biahučaha hoda dziaržmiažu Respubliki Biełaruś pierasiakli 9,6 miljona čałaviek, ź ich 5,7 — biełarusy, dola zamiežnych hramadzian skłała 3,9 miljona čałaviek.
Stabilnym pa intensiŭnaści transpartnaha patoku zastajecca polski kirunak — 3,6 miljona čałaviek. Niekalki «sastupaje» prybałtyjski ŭčastak: Łatvija — 364 tysiačy čałaviek, Litva — 2,1 miljona čałaviek. Spad nazirajecca na miažy z Ukrainaj: 2,6 miljona čałaviek, što na 20% mienš za anałahičny pieryjad minułaha hoda.
«Pry ahulnym źnižeńni pasažyrapatoku śpiecyjalisty adznačajuć pavieličeńnie na 20% papularnaści avijatranspartu. Turysty vybirajuć maršruty, dzie mohuć adpačyć, nie bajučysia za svaje žyćci. Taksama hraje rolu značny vyjhryš u časie i košt biletaŭ, jaki ŭžo praktyčna zraŭniaŭsia z čyhunačnym transpartam», — adznačajuć u DPK.
Pačynajuć adradžacca trochi ekzatyčnyja i zbolšaha zabytyja dla Biełarusi račnyja spłavy. Z kožnym hodam kolkaść žadajučych pierasiačy miažu pa vodnaj roŭniadzi stanovicca bolš — što źviazana i z rastučymi prapanovami ad turahienctvaŭ. Kali ŭ minułym paŭhodździ takich pasažyraŭ było ŭsiaho tolki 39, to ŭ ciapierašnim užo 257 čałaviek. Asnoŭnyja napramki — Łojeŭščyna i Aŭhustoŭski kanał.
Bolš za hod dziejničaje biaźvizavy režym dla naviedvańnia Nacyjanalnaha parka «Biełaviežskaja pušča». Dadzienaj mahčymaściu ŭžo skarystalisia bolš čym 2000 zamiežnikaŭ, hramadzianaŭ ES, Kanady, ZŠA, Respubliki Filipiny, Paŭdniovaj Karei.
«U apošni čas adznačajecca novaja tendencyja: «čaŭnočny vyjezd» staŭ mienš intensiŭnym, pajezdki za miažu mianiajuć charaktar z tavarnaha na turystyčny. I jak vynik — źmiena da lepšaha situacyi ŭ punktach propusku. Čerhaŭ stanovicca mienš, a pierachod dla zakonapasłuchmianych hramadzian praściejšy i kamfortniejšy», — paviedamlaje Dziaržpamiežkamitet.
Stanovišča na miažy stabilnaje i kantralavanaje. Za košt pierakryćcia kanałaŭ bolš čym u 5 razoŭ źniziłasia aktyŭnaść patokaŭ niezakonnaj mihracyi hramadzian Vjetnama. Orhanami pamiežnaj słužby vykryta 19 kanałaŭ niezakonnaj mihracyi, zatrymana 30 arhanizataraŭ i pamahatych. Hieahrafija zychodu niezakonnych mihrantaŭ raznastajnaja. Za parušeńnie dziaržmiažy zatrymlivalisia hramadzianie: Hruzii — 35, Rasijskaj Fiederacyi — 30, Vjetnama — 23, Kyrhyzstana — 6, Turcyi — 4, Maroka — 3, Nihieryi — 3, Niepała — 3, Irana — 2, Tunisa — 2, Ekvadora — 2, Uźbiekistana — 2, Sudana — 1, Livana — 1. Arhanizataraŭ niezakonnaj mihracyi pryciahvaje adnosna novy i davoli praciahły prybałtyjski ŭčastak. Inšaja sprava — polski kirunak. Jon tradycyjna ličycca adnym z najbolš ciažka pieraadolvalnych «barjeraŭ».
Da zabieśpiačeńnia achovy miežaŭ padklučajecca i miascovaje nasielnictva — bolš za pałovu parušalnikaŭ vyjaŭlena i zatrymana ź jaho dapamohaj.
