«My bačym, što ludzi pa-raniejšamu kurać, i adnych zabaronnych mier vidavočna niedastatkova, — adznačyŭ kiraŭnik krainy. — Nie sakret, što zabaronieny płod zaŭsiody sałodki dla tych, chto pačynaje kuryć. A kurcam sa stažam patrabujecca mocnaja matyvacyja dla admovy ad kureńnia. Pryjšoŭ čas dla pošuku novych šlachoŭ vyrašeńnia hetaj prablemy, jakija buduć uličvać realny stan spraŭ i psichałohiju ludziej».
Alaksandr Łukašenka padkreśliŭ, što suśvietny dośvied i praktyka pakazvajuć, što dla dasiahnieńnia vyniku patrebnyja nie tatalnyja zabarony, a pradumany kompleks zachadaŭ.
«Administracyjnyja abmiežavańni pavinny arhanična spałučacca z roznaha rodu stymułami, zaachvočvańniami i infarmacyjnaj pracaj. Asnoŭnaja rola tut advodzicca miedykam, žurnalistam, piedahoham, ideołaham», — skazaŭ kiraŭnik dziaržavy.
Pavodle słoŭ kiraŭnika krainy, u Biełarusi prablema spažyvańnia tytuniovych vyrabaŭ zastajecca surjoznaj. Niahledziačy na miery, u krainie kuryć amal pałova mužčynskaha nasielnictva, usio čaściej za hetaj zvyčkaj pakutuje moładź.
«Bolš za toje, źjaŭlajucca novyja pradukty dla imitacyi kureńnia, jakija nanosiać nie mienšy škodu zdaroŭju, čym tytuń. Havorka idzie ab elektronnych cyharetach, jakija stanoviacca ŭsio bolš papularnymi. Jany pryciahvajuć svajoj niezvyčajnaściu, dastupnaściu, adsutnaściu infarmacyi pra škodu ich vykarystańnia. Dy i nie ŭsie zhadžajucca z tym, što jany škodnyja nastolki, nakolki škodnyja tradycyjnyja cyharety», — skazaŭ kiraŭnik dziaržavy.
Alaksandr Łukašenka adznačyŭ, što padstavaj dla hetaj razmovy staŭ prajekt dekreta, jaki ŭniesieny na jaho razhlad. «Dakumient surjozny. Ja jaho pavinien razhledzieć i padpisać. Ale paličyŭ nieabchodnym pa prablemach, jakija adnosiacca da prajektu dadzienaha dekreta, jašče raz paraicca, viarnuŭšysia ŭ cełym da pytańniaŭ vytvorčaści i spažyvańnia tytuniovych vyrabaŭ», — zajaviŭ Łukašenka.
Jon nahadaŭ, što dekret, zaklikany źnizić spažyvańnie tytuniu žycharami Biełarusi byŭ pryniaty jašče ŭ 2002 hodzie, i nieabchodnyja źmieny ŭnosiacca ŭ jaho rehularna. «Ale naležnaha vyniku, na jaki my raźličvali, pakul niama. Tamu, pa-pieršaje, nam varta praanalizavać, jak vykonvajucca pałažeńni dekreta ŭ dziejučaj redakcyi i jakich zruchaŭ ŭdałosia dasiahnuć. Pa-druhoje (pra adkaznych za realizacyju jaho norm), nakolki efiektyŭna my adsočvajem vyniki raboty, jakaja pravodzicca?» — pastaviŭ pytańni kiraŭnik dziaržavy.
Novym prajektam dekreta, u pryvatnaści, prapanujecca pryraŭniać elektronnyja cyharety da tytuniovych vyrabaŭ i pašyryć pieralik miescaŭ, u jakich kureńnie zabaraniajecca. «Ale ŭźnikaje pytańnie, ci pryniasuć hetyja miery čakany efiekt? — adznačyŭ Alaksandr Łukašenka. — My pavinny abmierkavać, ci ŭsio praduhledžana ŭ prajekcie dekreta, ci jość alternatyŭnyja šlachi dla źnižeńnia tytuniekureńnia ŭ Biełarusi?»
