29 traŭnia ŭ Miensku minaki, prachodziačy ŭzdoŭž raki Śvisłač u rajonie Trajeckaha pradmieścia, kala tak zvanaha «harbataha mostu», jaki viadzie da Vostravu śloz, bačyli, jak nad vadoju kłubicca para.
Načalnik dyspetčarskaj słužby Mienskich ciepłasietak, jaki nie nazvaŭ svajho proźvišča, patłumačyŭ Radyjo Svaboda, što paru možna było bačyć tolki ranicaj, kali temperatura pavietra była nievysokaja. Udzień, kali słupok termometra dajšoŭ amal da 20 hradusaŭ, pary nie pavinna być vidno. Načalnik dyspetčarskaj słužby paćvierdziŭ, što ŭ centry horadu idzie planavy ramont ciepłasietak, pravodzicca adklučeńnie haračaj vady:
«Reč usia ŭ tym, što ŭ nas jość učastak sietak, jaki ciapier na ramoncie, i jon drenažujecca. I vada pa liŭnievaj kanalizacyi traplaje ŭ rečku Śvisłač. Nam adpampoŭvać vadu niama kudy: my ž nia možam vylivać jaje na vulicu Bahdanoviča abo na Trajeckaje pradmieście. Tamu vada drenažujecca i pa liŭnievym kalektary pastupaje ŭ raku Śvisłač».
Karespandentka: «Ale ž vada haračaja…»
«A jakaja vada ŭ nas u sietkach? Jana haračaja i jość. My ž jaje nia možam astudzić. Heta ŭ vodapravodzie vada chałodnaja. A ŭ nas vada haračaja, tamu j nazyvajemsia my «Ciepłavyja sietki».
U Śvisłačy jość miesca, dzie temperatura vady dasiahaje bolš za 50 hradusaŭ pavodle Celsija. Ale krychu dalej da źlivu vady temperatura ŭ Śvisłačy całkam prymalnaja dla kupańnia — kala 30 hradusaŭ. Na pytańnie, ci nie paškodzić heta ekalohii, rybie, jakaja, niahledziačy na zabrudžanaść, jašče viadziecca ŭ race, načalnik dyspetčarskaj słužby Mienskich ciepłasietak adkazaŭ tak:
«Rybam nie paškodzić, naahuł ničomu nie paškodzić. My tak adrehulavali, kab vykid vady byŭ nievialiki. Ja nie ekolah, ja prosta vam patłumačyŭ sytuacyju, jakaja jość».
