Kampanija Moon Express atrymała mahčymaść stać pieršaj pryvatnaj kampanijaj, jakaja adpravić kaśmičny aparat na Miesiac, — urad ZŠA ŭ sieradu ŭchvaliŭ prajekt misii.
techcrunch.com
«Tolki try supierdziaržavy vysadžvalisia na jakuju-niebudź płanietu — my staniem čaćviortaj supierdziaržavaj», — paabiacaŭ suzasnavalnik kampanii Navin Džejn u intervju. Jon spadziajecca, što pasadku ŭdasca ździejśnić užo ŭ 2017 hodzie.
Kampanija Moon Express, jakaja bazujecca ŭ Fłarydzie, spadziajecca vyjhrać konkurs na vysadku pieršaha ŭ śviecie pryvatnaha miesiacachoda — Google Lunar X-Prize, pryzavy fond jakoha składaje 30 młn dalaraŭ.
Pryz budzie ŭručany kampanii, jakaja zmoža pieršaj pasadzić kaśmičny aparat na Miesiac. Pa ŭmovach konkursu, aparat pavinien prajechać 500 mietraŭ pa pavierchni Miesiaca i pieradać videa ŭ vysokaj jakaści nazad na Ziamlu.
Zajaŭku na ŭdzieł u ciapierašni čas padali 16 kampanij, niekalki ź ich taksama płanujuć zapusk na 2017 hod.
Rehulujučyja orhany ZŠA ŭpieršyniu vydali ŭchvału dla pryvatnaj misii, jakaja vychodzić za miežy kalaziamnoj arbity.
Da hetaha kamiercyjnyja kampanii ŭ asnoŭnym zapuskali spadarožniki, a ŭsie śpiecyjalizavanyja pryvatnyja misii, naprykład, dastaŭka hruzaŭ na kaśmičnuju stancyju, kantralavalisia NASA.
Amierykanskaje zakanadaŭstva akazałasia nie hatovym da prajekta kampanii, i dazvoł dla Moon Express pakul nosić indyvidualny charaktar.
Adnak palityki ŭ ZŠA ŭžo aktyŭna pracujuć nad zakonaprajektami, jakija rehulujuć padobnyja misii, piša vydańnie Verge.
Nieabchodnaść u padobnym zakanadaŭstvie ŭ bližejšy čas, vidavočna, uzraście: kampanija SpaceX užo abviaściła ab płanach adpravić kaśmičny karabiel na Mars u 2018 hodzie, a Bigelow Aerospace choča da 2020 hoda zapuścić prajekt kaśmičnych hatelaŭ.
