U Połacku ŭ hreka-katalickaj parafii śviatoj Paraskievy Połackaj 6 žniŭnia, u śviata Pieramianieńnia Hospada, adbyłasia prezientacyja novaha hruntoŭnaha vydańnia z haliny ajčynnaj biblijnaj spadčyny, – «Psałtyra» (knihi Psalmaŭ Davida) u pierakładzie a. Alaksandra Nadsana.
Prezientacyja knihi była prymierkavanaja adrazu da dvuch dataŭ – 8 lipienia niadaŭna pamierłamu a. Nadsanu spoŭniłasia b 90 hadoŭ. Druhaja data amal kruhłaja – 499 hadoŭ tamu ŭ Prazie, u dzień śviata Pieramianieńnia Hospada, Francišak Skaryna nadrukavaŭ «Psałtyr» – pieršuju knihu na biełaruskaj movie, jakaja stałasia adnačasova pieršym relihijnym vydańniem pa-biełarusku.
«Hetaja padzieja stałasia sapraŭdnym Śviatam Pieramianieńnia našaj nacyi na šlachu chryścijanstva i cyvilizavanaści», – razvažaje redaktar vydańnia, bibiliist, ryma-katalicki śviatar Siarhiej Surynovič z Drui. Taksama ŭ svaim razhornutym ŭstupie da knihi ks. Surynovič ŭvodzić čytača ŭ bijahrafiju pierakładčyka i znajomić ź Sieptuahintaj – starahreckaj viersijaj Śviatoha Pisańnia, jaje značeńniem u Novym Zapaviecie i va Uschodniaj Carkvie.
Vydańnie «Psałtyra» – hrandyjoznaj pracy žyćcia a. Nadsana – zapačatkavaŭ jaho pierajemnik u Łondanie, dušpastyr biełarusaŭ Vialikabrytanii, hreka-katalicki śviatar a. Siarhiej Stasievič, majučy metaj ušanavać takim čynam šlach śviatara i biełarusa, jaki ciaham usiaho žyćcia słužyŭ Baćkaŭščynie na čužynie.
Ajciec Siarhiej Stasievič inicyjavaŭ supolnuju padrychtoŭku vydańnia, sabraŭšy kamandu adnadumcaŭ: ustupnuju i zaklučnuju malitvu, źmieščanyja ŭ knizie, padrychtavaŭ a. Alaksandr Aŭdziajuk, karekturu knihi rabiła pierakładčyca i litaratarka Kryścina Kurčankova, mastackaje afarmleńnie knihi ździejśniła mastačka Alena Tkačova, admysłovy šryft na padstavie knihaŭ Skaryny raspracavaŭ Anton Bryl, unuk Janki Bryla.
Prezientacyi knihi, jakaja adbyłasia ŭ prychodzie z udziełam Apostalskaha vizitatara dla hreka-katalikoŭ Biełarusi, archimandryta Siarhieja Hajeka, i barda, aŭtara i vykanaŭcy duchoŭnaj liryki Arcioma Sitnikava, papiaredničała Boskaja liturhija, padčas jakoj nastajaciel prychoda a. Alaksandr Šaŭcoŭ zaklikaŭ viernikaŭ da duchoŭnaha pieramianieńnia, u t. ł., z dapamohaj Śviatoha Pisańnia na rodnaj movie, a taksama, zhodna z uschodnie-chryścijanskaj tradycyjaj, aśviaciŭ dary ziamli – vinahrad, jabłyki i hrušy, jakimi paśla častavalisia vierniki, kirujučysia na prezientacyju ŭ prychodskuju zalu.
Na praciahu žyćcia a. Alaksandr Nadsan rabiŭ vielizarnuju pracu pa pierakładzie liturhičnych tekstaŭ vizantyjskaj tradycyi. Plon jaho pracy za dvaccać hadoŭ – poŭny zbor bahasłužbaŭ. Ciapier hetaja praca dastupnaja biełaruskim viernikam.
Ajciec Nadsan nie abmiažoŭvaŭsia pierakładami: raźvivajučy biełaruskuju liturhičnuju tradycyju, jon uvodziŭ va ŭžytak malitvy i akafisty Skaryny, sam składaŭ teksty słužbaŭ (ab pamnažeńni lubovi, da śviatoj Jeŭfrasińni Połackaj, da śviatoha Kiryły Turaŭskaha i inšyja). Da apošniaha hoda svajho doŭhaha žyćcia jon nie spyniaŭ pracy nad Knihaj psałmoŭ.
