Na minskuju kvateru aktyvistki hramadskaj inicyjatyvy «Suprać biezzakońnia ŭ sudach i prakuratury» jurysta Tamary Siarhiej nakładzieny aryšt praź niavypłatu joju štrafu za ŭdzieł u niesankcyjanavanaj vuličnaj akcyi.
Siarhiej paviedamiła, što 24 červienia Minharsud pakinuŭ u sile rašeńnie suda Centralnaha rajona stalicy ab štrafie pamieram 40 bazavych vieličyń (840 denaminavanych rubloŭ) za ŭdzieł aktyvistki ŭ adnoj z arhanizavanych inicyjatyvaj akcyj.
U hety ž dzień pieršapačatkovaje rašeńnie suda nabyło moc; u aktyvistki byŭ miesiac na toje, kab apłacić štraf. 25 lipienia, paśla niavypłaty štrafu, materyjały ab im pastupili sudovym vykanaŭcam, a ŭžo 27 lipienia dvoje vykanaŭcaŭ pryjšli ŭ kvateru da Siarhiej. «Niahledziačy na toje što pastanovu ab raspačynańni vykanaŭčaj vytvorčaści ja nie atrymlivała, jany adrazu pryjšli. Ja ich nie puściła, praz začynienyja dźviery skazała, kab mianie apaviaścili naležnym čynam. Litaralna 1 žniŭnia mnie pryjšoŭ zakazny list, ale atrymała ja jaho tolki 3 žniŭnia, pakolki nie była ŭ Minsku», — paviedamiła juryst.
4 žniŭnia sudovyja vykanaŭcy pryjšli znoŭ, paviedamili ab nakładańni aryštu na kvateru Siarhiej, u jakoj jana žyvie z dvuma členami siamji, i mieli namier ahledzieć usiu majomaść.
Aktyvistka źviartaje ŭvahu na chutkaść, ź jakoj sudovyja vykanaŭcy ŭzialisia za spahnańnie ź jaje štrafu. «Chutkaść hetych dziejańniaŭ prosta ŭražvaje i dakazvaje, što da mianie staviacca nie tak, jak da zvyčajnych hramadzian. Časam sudovyja vykanaŭcy na hady zaciahvajuć vytvorčaść, a tut na praciahu tydnia dvojčy prychodzili i stajali kala dźviarej», — adznačyła jana.
Siarhiej źviartaje ŭvahu na dźvie akaličnaści: pa-pieršaje, parušana jaje prava na abskardžańnie rašeńnia ab raspačynańni vykanaŭčaj vytvorčaści, pakolki nie vytrymany adviedzieny na heta termin, pa-druhoje, Hramadzianska-pracesualny kodeks zabaraniaje nakładańnie aryštu na žyllo, u jakim niepasredna žyvie adkazčyk. Heta jany vykłała ŭ skarzie na imia načalnika rajonnaha adździeła sudovaha vykanańnia, padadzienaj 5 žniŭnia. Akramia taho, padkreśliła Siarhiej, u jaje jość lehalny dachod i sudovyja vykanaŭcy mahli vyličvać srodki ź jaho, ale nie stali hetaha rabić. «Chaču źviarnuć uvahu na nieadekvatnaść situacyi: pamier štrafu — 422 dołary, a aryšt nakładvajuć na nieruchomaść», — adznačyła aktyvistka.
8 žniŭnia Siarhiej była na pryjomie ŭ kiraŭnictva ŭpraŭleńnia prymusovaha vykanańnia hałoŭnaha ŭpraŭleńnia justycyi Minharvykankama. «Ja skazała: u maju kvateru jany ŭvojduć tolki uzłamaŭšy maje mietaličnyja dźviery», — skazała juryst.
Pry hetym Siarhiej padkreśliła, što pryncypova nie maje namieru apłačvać štraf, pakolki ličyć pastanovu ab im niezakonnaj. «U mianie tut vyraznaja pazicyja: sudy prosta vykonvajuć rašeńni Administracyi prezidenta. My sprabavali danieści svaje prablemy, i reakcyju na našy dziejańni ja rasceńvaju jak adkaz kiraŭnika dziaržavy na našy zvaroty», — zajaviła aktyvistka.
Hramadskaja inicyjatyva «Suprać biezzakońnia ŭ sudach i prakuratury» abjadnoŭvaje pieravažna ludziej pažyłoha ŭzrostu z roznych rehijonaŭ, čyje svajaki, na ich dumku, paciarpieli ad sudovaha i milicejskaha samavolstva. Aktyvisty inicyjatyvy pieryjadyčna pravodziać u Minsku vuličnyja akcyi, na jakich sprabujuć pryciahnuć uvahu da svaich prablem. Taksama členy inicyjatyvy nieadnarazova rabili sproby kalektyŭnych zvarotaŭ u Administracyju prezidenta.
