Pavieł Kryvicki. Fota belta.by.
Siarod ich i 32-hadovy biełaruski kidalnik mołata Pavieł Kryvicki, jaki na Hulniach u Łondanie zaniaŭ 28-je miesca. Pierapravierka probaŭ AH-2012 vyjaviła najaŭnaść zabaronienych rečyvaŭ: stanazałoł i dehidrachłormietyłtestasteron (turynaboł).
Pry hetym Pavieł Kryvicki ŭžo adbyvaje čatyrochhadovuju dyskvalifikacyju za parušeńnie antydopinhavych praviłaŭ, adlik jakoj viadziecca ad 11 červienia 2015 hoda. Tady ŭ dopinh-probie Kryvickaha znajšli harmon rostu.
Ciapier Kryvickamu pahražaje pažyćciovaje adłučeńnie ad sportu.
Pavieł Kryvicki — pieramožca moładzievaha (da 23 hadoŭ) čempijanatu Jeŭropy-2005, zaniaŭ 5-je miesca na darosłym čempijanacie śvietu-2011, staŭ 4-m na čempijanacie Jeŭropy-2014, siarebrany pryzior zimovaha Kubka Jeŭropy-2013 pa lohkaatletyčnych kidańniach.
Pierapravierki dopinh-probaŭ Łondana-2012 pryviała i da dyskvalifikacyi ŭkrainskaha 31-hadovaha kidalnika dzidy Alaksandra Piatnicy, jaki vymušany budzie viarnuć srebny miedal Alimpijady. U jaho analizach znajšli ŭsio toj ža dehidrachłormietyłtestasteron (turynaboł). Takim čynam, srebra Hulniaŭ u Łondanie dastaniecca pradstaŭniku Finlandyi Anci Ruuskanienu, a bronza — Viačasłavu Viasiołamu z Čechii, jaki byŭ čaćviortym.
Padčas pierapravierki probaŭ Alimpijady-2008 papalisia taksama dźvie ciažkaatletki — Nurkan Tajłan (katehoryja da 48 kh) z Turcyi i Rypsimie Churšudzian (75 kh) z Armienii. U abiedźviuch znajšli stanazałoł.
Što tyčycca biełaruskich ciažkaatletaŭ, to, jak užo paviedamlałasia, u vyniku pierapravierak dopinh-probaŭ alimpijskich miedaloŭ Łondana-2012, vierahodna, buduć pazbaŭlenyja dźvie biełaruski — heta bronzavyja pryziorki Maryna Škiermankova (da 69 kh) i Iryna Kuleša (da 75 kh). Akramia taho, dopinh znajšli ŭ probach Dziny Sazanaviec (da 69 kh, 4-je miesca na Hulniach-2012) i Jaŭhiena Žarnasieka (zvyš 105 kh, 9-je miesca).
A ŭ kancy śniežnia 2015 hoda abviaścili pra stanoŭčyja dopinh-proby bronzavaj miedalistki Alimpijady-2008 i čempijonki śvietu-2011 34-hadovaj Nastaśsi Novikavaj i 22-hadovaha Alaksandra Vienskiela, jaki ŭ 2010 hodzie byŭ kapitanam biełaruskaj zbornaj na I letnich junackich Alimpijskich hulniach u Sinhapury, a ŭ 2015 hodzie staŭ bronzavym pryzioram ČIE-2015. I Novikava, i Vienskiel byli dyskvalifikavanyja na 4 hady.
U kancy lipienia taksama stała viadoma, što paśla pierapravierki probaŭ Piekina-2008 u Biełarusi mohuć adabrać jašče dva miedali — zołata kidalnicy mołata Aksany Miańkovaj i srebra šturchalnicy jadra Natalli Michnievič.
