Niadaŭna ŭ internecie źjaviŭsia rolik, na jakim kiroŭca tralejbusa patrabuje vydalić svaje fota ŭ dvaich chłopcaŭ. Dla razmovy žančynie daviałosia pakinuć pracoŭnaje miesca, a heta ŭžo parušeńnie słužbovaj instrukcyi. Jak vynik — bolš za 150 tysiač prahladaŭ u internecie i trahiedyja, jakoj skončyŭsia hety vypadak.
«Prybiarycie kamieru! U vas niama prava mianie zdymać! — Jość prava! Pa zakonu! Idzicie na svajo miesca! Vas čakajuć!»
Užo miesiac heta videa burna abmiarkoŭvajuć u internecie. Kiroŭca tralejbusa sprabuje adabrać u maładych ludziej telefon — žančyna nie chacieła, kab jaje zdymali za rulom. Praŭda, mała, chto zadajecca pytańniem, z čaho ŭsio pačałosia, i ŭžo zusim niešmatlikija dumajuć pra nastupstvy.
Natalla Siańkievič, kiroŭca tralejbusa: «Uklučyła pavarot, uziała na ručnik. Adkryła dźviery, u mianie lažaŭ na paneli sucharyk. Ja znachodziłasia ŭ stanoviščy i mnie vielmi chaciełasia jeści. Ja vyrašyła jaho adkusić, pavaročvajusia, a jany mianie zdymajuć. Ja vyjšła, stała vyśviatlać ź imi adnosiny i sarvałasia».
U Natana i Illi — niezvyčajnaje chobi. Chłopcy hadzinami jeździać pa horadzie i fatahrafujuć hramadski transpart. Kamuści padabajecca źbirać marki, a jany, kažuć, u zachapleńni ad aŭtobusaŭ i tralejbusaŭ. Padobnym u Minsku zachaplajucca kala 70 čałaviek. Ich cikavić litaralna ŭsio — ad pryłady ruchavika kankretnaj madeli da daty jaje vypusku.
«Padjazdžaje tralejbus, ja, jak zvyčajna, naładžvaju kamieru i, jak zvyčajna, rablu taki kadr. Dźviery adčyniajucca. Zaŭsiody rablu videazdymku, tamu što ja zdymaju, kali ŭźnikaje kanflikt».
Illi — 16 hadoŭ, Natanu — 18, ale svaje pravy jany viedajuć. Niekamiercyjnaja zdymka ŭ hramadskich miescach sapraŭdy nie zabaronienaja, i heta paćviardžajuć i ŭ Minsktransie. Prykłaŭšy videa kanfliktu, chłopcy napisali list kiraŭnictvu tralejbusnaha parka i nieŭzabavie atrymali adkaz.
Illa Zabarońka: «Pra toje, što depremiravany načalnik kałony i depremiravany sam kiroŭca».
Pakul videa imkliva nabirała papularnaść, žyćcio Natalli hetak ža imkliva rujnavałasia. Staž pracy — 16 hadoŭ, dvoje dziaciej. Razam z mužam budujuć kvateru i da taho, što zdaryłasia, čakali treciaha małoha.
Natalla Siańkievič, kiroŭca tralejbusa: «14-ha zdaryłasia heta, a 20-ha ja straciła dzicia. Hetyja chłopcy pieraviarnuli ŭsio majo žyćcio. A ŭ adzin dzień jany vykłali heta videa na YouTube. Ja bajałasia vychodzić na vulicu, dzicia majo bajałasia, i hetaja situacyja na pracy — nie zrazumieła, budu ja pracavać, nie budu pracavać. Skazali, što situacyja nieardynarnaja i za takija vypadki mohuć zvolnić».
Natan i Illa svajo chobi ličać absalutna biaskryŭdnym. Kažuć, i padumać nie mahli, što ŭsiaho adno fota moža pryvieści da takich nastupstvaŭ. U haračcy apublikavali i toje samaje videa, dumali, dapamoža damahčysia spraviadlivaści. My raspaviali maładym ludziam, što ciapier pieražyvaje Natalla, i jany paprasili ab sustrečy.
«Vybačajcie za ŭsio, što adbyłosia, voś vam bukiet ad nas. My prosta fatahrafavali tralejbus».
Jana nie adrazu pahadziłasia pryniać kvietki i ŭžo nie zmahła strymlivać ślozy. Pryznałasia, što ŭ toj dzień sapraŭdy nie vytrymała, ale tolki tamu, što na darozie zaŭsiody hranična ŭvažlivaja.
Natalla Siańkievič, kiroŭca tralejbusa: «Ja taksama chaču pierad taboj paprasić prabačeńnia, ja nie strymałasia i vyjšła vyśviatlać z taboj adnosiny. Daroha sama pa sabie stres. Ja pieravožu bolš za tysiaču pasažyraŭ!»
Paśla razmovy z hierainiaj našumiełaha videa (užo pa dušach) aŭtary źbiralisia znoŭ źviartacca ŭ Minsktrans — užo z vybačeńniami i prośbaj nie zvalniać supracoŭnicu. Ale ŭ kiraŭnictvie ŭ situacyi razabralisia i sami.
Siarhiej Ščarbakoŭ, v.a. namieśnika dyrektara filijała «Tralejbusny park №4»: «Naša pradpryjemstva haroj staić za rabotnikaŭ, jakija dobrasumlenna vykonvajuć svaje słužbovyja i pracoŭnyja abaviazki. Za toj vypadak Natalla ŭžo paniesła pakarańnie: za toje, što pakinuła pracoŭnaje miesca i ŭstupiła ŭ kanflikt z maładymi ludźmi, była pazbaŭlenaja premii za červień. U ciapierašni čas pytańnie ab jaje zvalnieńni nie staić».
Viadoma, u siamji Natalli niachutka zabuduć pra hetuju historyju, a Illa i Natan zadumalisia ab źmienie chobi. Zakon zakonam, ale časam u pahoni za łajkami i prahladami varta acanić nastupstvy.
