U pieršym paŭhodździ valutnaja vyručka Biełarusi skaraciłasia amal na 3 młrd dołaraŭ u paraŭnańni z anałahičnym pieryjadam minułaha hoda, śviedčać danyja Nacbanka.
U hrašovym vyražeńni valutnyja pastupleńni skłali 13,7 młrd dołaraŭ i źnizilisia ŭ paraŭnańni z anałahičnym pieryjadam minułaha hoda na 18%, abo na 2,96 młrd dołaraŭ.
Skaračeńnie valutnych pastupleńniaŭ Biełarusi ŭ biahučym hodzie źviazanaje šmat u čym z pamianšeńniem ekspartnaj vyručki krainy. Pastupleńni ad ekspartu tavaraŭ i pasłuh u studzieni—červieni 2016 hoda skłali 13,4 młrd. dołaraŭ i źnizilisia na 2,9 młrd u paraŭnańni z anałahičnym pieryjadam minułaha hoda.
Jak śviedčać danyja ab źniešnim handli, značny ŭpłyŭ na źnižeńnie ekspartu akazała situacyja z prodažam na źniešnich rynkach syravinnych tavaraŭ.
Tak, ekspart biełaruskich naftapraduktaŭ, kalijnych uhnajeńniaŭ i nafty ŭ studzieni—červieni skłaŭ 3,57 młrd dołaraŭ i skaraciŭsia ŭ paraŭnańni ź pieršym paŭhodździem 2015 hoda praktyčna roŭna na 2 młrd dołaraŭ.
Źnižeńnie biełaruskaha ekspartu ŭ pieršym paŭhodździ nazirałasia i pa inšych napramkach.
Da prykładu, ekspart biełaruskaj sielskahaspadarčaj pradukcyi i praduktaŭ charčavańnia skłaŭ u pieršym paŭhodździ kala 1,9 młrd dołaraŭ i skaraciŭsia na 307,4 młn dołaraŭ, abo na 14% u paraŭnańni z anałahičnym pieryjadam minułaha hoda. Akramia hetaha, ekspart biełaruskich pasłuh u pieršym paŭhodździ źniziŭsia na 150 młn dołaraŭ.
Varta zaznačyć, što ekspart tavaraŭ i pasłuh i jak śledstva valutnaja vyručka Biełarusi źnižajucca ŭžo čaćviorty hod zapar.
Tak, u 2013-m u paraŭnańni z 2012-m ekspart źniziŭsia na 15,1%, u 2014-m — na 1,7%, u 2015-m — na 24,2%, i za pieršuju pałovu 2016-ha ekspart tavaraŭ i pasłuh skaraciŭsia na 16,1% u paraŭnańni z anałahičnym pieryjadam minułaha hoda.
