Pakazalnym prykładam vykarystańnia administracyjnaha resursu, — piša błohier d-zholik, — źjaŭlajecca situacyja z prapichvańniem u parłamient niaźmiennaha staršyni Hrodzienskaj abłasnoj vybarčaj kamisii pa vybarach prezidenta i deputataŭ usich uzroŭniaŭ, eks-adkaznaha rabotnika Hrodzienskaha abłvykankama, dziejnaha staršyni Hrodzienskaj abłasnoj arhanizacyi Biełaruskaha prafsajuza rabotnikaŭ dziaržaŭnych i inšych ustanoŭ, člena Kamunistyčnaj partyi Biełarusi Valeryj Saŭko.
8 lipienia akruhovaja vybarčaja kamisija Ščučynskaj vybarčaj akruhi №60, u jakuju ŭvachodziać Ščučynski i Mastoŭski rajony Hrodzienskaj vobłaści, rehistruje inicyjatyŭnuju hrupu hramadzian pa vyłučeńni zhadanaj asoby kandydatam u deputaty Pałaty pradstaŭnikoŭ Nacyjanalnaha schodu šostaha sklikańnia.
Uradženiec Dziatłaŭščyny nie advažyŭsia b vyłučacca na svajoj małoj radzimie, dzie jaho dobra viedajuć ziemlaki, dyj tamtejšuju vybarčuju akruhu pamiž saboj nie padzialili prakuror rajona i pieršy namieśnik ministra MUS. Pry takich abstavinach prafsajuznamu kamunistu ŭ rodnym krai łavić nie było čaho. Dla jaho padabrali inšuju akruhu, dzie jaho nichto nie viedaŭ.
12 lipienia hałoŭnym artykułam na sajcie abłasnoj haziety «Hrodzienskaja praŭda» (50 tys. naviedvalnikaŭ na tydzień) u raździele «Hałoŭnaje» źjaŭlajecca abjomnaje intervju sa staršynioj prafsajuza [1], čyja inicyjatyŭnaja hrupa ŭ toj momant užo ažyćciaŭlała zbor podpisaŭ za jaho vyłučeńnie ŭ deputaty.
I choć vyłučeńnie ŭ artykule farmalna naŭprost nie fihuruje, adnak padstavaj dla intervju byŭ zajaŭleny nibyta 60-hadovy jubilej prafsajuznaj supołki. Jubilej sapraŭdy mieŭ miesca być, voś tolki zdaryŭsia jon jašče ŭ pieršyja dni sakavika, a intervju źjaviłasia tolki praz čatyry z pałovaj miesiacy paśla hetaha. Pa dziŭnym supadzieńni ŭ samy razhar vyłučeńnia «tavaryša» Saŭko na vybarnuju pasadu.
Artykuł pačynajecca i praciahvajecca apaviadańniem Valeryja Saŭko ab projdzienym šlachu, ab ułasnym losie, etapach stanaŭleńnia: dzie vučyŭsia, jak pačynaŭ zaŭharam u kałhasie, praciahnuŭ kiraŭnictvam rajkama kamsamoła, padaŭsia ŭ biznes, adtul na pasadu namieśnika staršyni Dziatłaŭskaha rajsavieta deputataŭ, zatym u Haradzienski abłvykankam namieśnikam načalnika ŭpraŭleńnia arhanizacyjna-kadravaj raboty…
Zdavałasia b, jakaja suviaź bijahrafii dziejača z «kisłym» jubilejem prafsajuza? Viadoma ž, heta była tolki padstava prapijaryć praŭładnaha kandydata, u jakoha mielisia vidavočnyja prablemy sa zboram podpisaŭ u svaju padtrymku.
Ale heta nie dapamahaje, i ŭ chod puskajuć ciažkuju artyleryju.
20 lipienia abłasnaja hazieta «Hrodzienskaja praŭda» (vypusk № 57; nakład paradku 40.000 ekz.) pieradrukoŭvaje artykuł z ŭłasnaha sajta, ale z novaj nazvaj «Prafsajuzy zaŭsiody pobač».
U toj ža dzień, jak paviedamlaje aficyjny sajt Hrodzienskaha abłasnoha abjadnańnia prafsajuzaŭ, u Ščučynie adbyłasia sustreča Valeryja Saŭko z delehatami piataha Usiebiełaruskaha narodnaha schodu. Mienavita takaja lehienda sustrečy mierkavanaha kandydata z rajonnym aktyvam była prydumanaja.
Na nazvanaj sustrečy, akramia samoha vyłučenca, pa aficyjnych dadzienych, uziali ŭdzieł Chviadziuk Hanna Stanisłavaŭna — namieśnik staršyni rajvykankama, Pašuk Juryj Tadevušavič — staršynia Ščučynskaha rajonnaha abjadnańnia prafsajuzaŭ, a taksama staršyni pieršasnych prafsajuznych arhanizacyj Ščučynskaha rajona ŭsich halinovych prafsajuzaŭ.
Voś tolki Juryj Pašuk, jaki prysutničaŭ na niezakonnym pieradvybarčym mierapryjemstvie i asabista ahitavaŭ za vyłučeńnie darahoha hościa z Hrodna (na fota: druhi sprava), źjaŭlajecca jašče i siabram akruhovaj vybarčaj kamisii Ščučynskaj vybarčaj akruhi № 60. [3] Da niadaŭniaha pierachodu na prafsajuznuju pracu źjaŭlaŭsia kiraŭnikom spraŭ — načalnikam kiraŭnictva spraŭ Ščučynskaha rajvykankama.
Anałahična Hanna Chviadziuk (na fota: pieršaja źleva) źjaŭlajecca nie prosta namieśnicaj, a namieśnicaj staršyni Ščučynskaha rajvykankama pa ideałohii. Da hetaha taksama pracavała kiraŭnikom spraŭ rajvykankama, a jašče raniej źjaŭlałasia sudździoj suda Ščučynskaha rajona.
Jak i ŭ vypadku z prafsajuznym jubilejem, piaty Usiebiełaruski schod mieŭ miesca być za miesiac da taho, jak im vyrašyŭ prykrycca mierkavany kandydat u deputaty z KPB Valeryj Saŭko.
Na samym «narodnym» schodzie ad rajona prysutničali tolki paŭtara dziasiatka miascovych kiraŭnikoŭ usich maściaŭ, u tym liku jak minimum adzin člen akruhovaj vybarčaj kamisii (Žukoŭski V.S.).
Zhodna z pres-relizam Hrodzienskaha abłasnoha abjadnańnia prafsajuzaŭ, Valeryj Saŭko vystupiŭ pierad prysutnymi z pramovaj, u jakoj razvažaŭ pra miralubnuju šmatviektarnuju źniešniuju palityku, pra siońniašniuju abstanoŭku ŭ śviecie, jakaja charaktaryzujecca abvastreńniem baraćby dziaržaŭ za lidzirujučyja pazicyi i kantrol nad rynkami syravinnych resursaŭ, imknieńniem hieapalityčnych centraŭ siły da pašyreńnia zon svajho stratehičnaha ŭpłyvu, što pryviało da błakavańnia intaresaŭ inšych dziaržaŭ, pravakavańnie napružanaści i spryjała ŭzmacnieńniu miždziaržaŭnych supiarečnaściaŭ.
Pa słovach kiraŭnika abłasnoj prafsajuznaj supołki, vybudoŭvańnie miralubnaj i dobrasusiedskaj palityki, nieprymalnaść vykarystańnia siły ŭ vyrašeńni mižnarodnych supiarečnaściaŭ dazvolili nam stać asnoŭnaj placoŭkaj dla pieramoŭ pa ŭrehulavańni ŭzbrojenaha kanfliktu ŭ našaj rodnaj krainie. Historyja nas navučyła, što lubaja miralubnaja palityka pavinna być padmacavana realnaj zdolnaściu dziaržavy abaranić svoj narod. Na prykładzie našych susiedziaŭ my pierakanalisia: mir vialikaja, najvialikšaja kaštoŭnaść! Stracić jaho vielmi lohka, a šlach ad miru da vajny moža być vielmi karotkim. Adzinstva naroda, mabilizacyja ŭsich jaho sił — voś što treba nie tolki dla taho, kab vystajać u lichi čas, ale i dla taho, kab praduchilić jaje prychod. Źbierahčy mir u krainie i źbierahčy samu krainu. U suviazi z hetym abaranazdolnaści i biaśpiecy našaj dziaržavy my nadajom pieršasnaje značeńnie. U nas raspracavany i pryniaty Kancepcyja nacyjanalnaj biaśpieki i novaja redakcyja Vajennaj daktryny. U ich sfarmulavany asnoŭnyja zadačy i vyznačany kirunki dziejnaści z ulikam sučasnych pahroz i vyklikaŭ.
Voś tolki jak usio heta tryźnieńnie ab zamiežnaj palitycy, nacyjanalnaj biaśpiecy i abaranazdolnaści krainy zakranaje statutnyja mety Hrodzienskaj abłasnoj arhanizacyi Biełaruskaha prafsajuza rabotnikaŭ dziaržaŭnych i inšych ustanoŭ i datyčycca zajaŭlenaj mety mierapryjemstva?!
Heta ŭsio było bolš padobna da pieradvybarčaha schodu, jaki mieŭ metaj ahitacyju za vyłučeńnie dadzienaha demahoha.
Na samoj sustrečy prysutničali kiraŭnictva miascovaj vykanaŭčaj ułady i rajonny aktyŭ, u tym liku prafsajuzny, ź liku siabroŭ inicyjatyŭnaj hrupy pa vyłučeńni kandydatam u deputaty, členy akruhovaj i ŭčastkovych vybarčych kamisij, a taksama miascovyja naziralniki.
23 lipienia artykuł «Hrodzienskaj praŭdy» pieradrukoŭvajuć ŭ subotnich numarach (z TB-prahramaj) dziaržaŭnyja haziety Ščučynskaha rajona «Dziannica» i Mastoŭskaha rajona «Zara nad Niomanam» [4] ahulnym nakładam kala 11 tysiač asobnikaŭ.
Pieradruki z abłasnoj haziety ŭ toj ža dzień źjaŭlajucca na sajtach ukazanych rajonnych haziet.
26 lipienia, praz tydzień paśla sustrečy hramadzianina Saŭko z aktyvam, jakaja adbyłasia ŭ Ščučynie, u miascovaj rajoncy i na jaje sajcie źjaŭlajecca artykuł «Saviet trymali prafsajuznyja aktyvisty» [pad słovami «saviet trymali» majecca na ŭvazie «radzilisia, adbyvali radu» — NN], pryśviečany mierapryjemstvu tydniovaj daŭniny.
Na pastanovačnym fota ŭ artykule mierkavany kandydat u deputaty — na fonie naroda.
Pa viersii žurnalista haziety, Valeryj Saŭko na sustrečy akcentavaŭ uvahu prysutnych na demahrafičnaj situacyi, zamacavańni maładych kadraŭ i nieabchodnaści ŭdychnuć novy žyćciovy impuls u sielskija nasielenyja punkty. Ab zamiežnaj palitycy, nacyjanalnaj biaśpiecy i abaranazdolnaści krainy ŭ artykule ni słova.
Što da hetaha času zaminała kamunistu Valeryju Saŭko pabudavać usieahulny sacyjalizm na Ziamli ci chacia b u asobna ŭziataj krainie, vypravić demahrafičnuju situacyju, udychnuć novy «žyćciovy impuls» u viosku i inš. u bytnaść SSSR, u časy jaho ŭdziełu ŭ biznesie, znachodžańnia na kirujučych pasadach u zakanadaŭčaj i vykanaŭčaj uładzie, a taksama piatnaccać apošnich hadoŭ na prafsajuznaj nivie — taksama nie raskryta.
27.07.201627 lipienia ŭ №58 haziety Mastoŭskaha rajona «Zara nad Niomanam» (nakład 4004 ekz.) byli nadrukavanyja adrazu dva ahitacyjnyja artykuły za vyłučeńnie praŭładnaha kandydata ŭ deputaty pa Ščučynskaj vybarčaj akruzie №60.
Jašče raniej abodva artykuły pa čarzie 21 i 25 lipienia źjavilisia na aficyjnym sajcie haziety. Adnak zatym daty ich publikacyi redakcyjaj naŭmysna byli źmienienyja na datu vychadu ŭ druk numara haziety.
Na staroncy 2 u artykule «U hodnych umovach» za aŭtarstvam redaktara radyjoviaščańnia Hanny Makar havorycca pra pikiet pa zbory miascovym rajkamam «BRSM» podpisaŭ za vyłučeńnie V.I. Saŭko, jaki adbyŭsia 21 lipienia na ažyŭlenaj vulicy rajonnaha centra. U artykule padrabiazna ŭkazanaja akruha, poŭnyja imia pa baćku i słužbovaje stanovišča kandydata, a taksama pryviedziena prostaja mova ad imia mifičnaj vybarščycy, u jakoj «mir, stabilnaść, spakoj, zabiaśpiečanaść budučyni, žyćcio ŭ svabodnaj i pryhožaj krainie» asacyjujecca z kandydatam Valeryjem Saŭko.
— Ja za mir, stabilnaść, spakoj, zabiaśpiečanaść budučyni, caniu toj fakt, što my žyviom u svabodnaj i pryhožaj krainie, tamu z upeŭnienaściu addaju svoj hołas za V. I. Saŭko, — padzialiłasia svaim mierkavańniem adna z mastaŭčanak.
Proźvišča, imia ci choć by inicyjałaŭ u «adnoj z mastaŭčanak» pry sabie nie akazałasia.
Na star. 4 u artykule «Ci idzie zbor podpisaŭ» za aŭtarstvam namieśnika hałoŭnaha redaktara Natalli Šeŭčyk u kalarovym palihrafičnym vykanańni, sa spasyłkaj na słovy staršyni Mastoŭskaha rajonnaha kamiteta Biełaruskaha hramadskaha abjadnańnia vieteranaŭ, paviedamlajecca pra aktyŭny ŭdzieł u vyłučeńni Valeryja Saŭko starejšaha i siaredniaha pakaleńnia, moładzi. Sam kandydat u artykule asacyjujecca sa stabilnaściu i spakojnym žyćciom, u toj čas jak astatnija — ź nieviadomaściu.
Hazieta infarmuje i pra toje, što zbor podpisaŭ za vyłučeńnie Valeryja Saŭko šlacham pikietavańnia pravodziać taksama aktyvisty Mastoŭskaj rajonnaj arhanizacyi HA «BRSM», rajonnych arhanizacyj Biełaruskaha sajuza žančyn, Fiederacyi prafsajuzaŭ Biełarusi, HA «Biełaja Ruś», KPB.
Viorstka numary ažyćcioŭlena tak, što pry pierahortvańni na razvarocie čytačy abaviazkova natyknucca na tuju ci inšuju natatku ab vyłučeńni Saŭko i ab jaho šyrokaj padtrymcy siarod vybarščykaŭ. Ab inšych vyłučencach — ni słova.
30 lipienia, za dva dni da zaviaršeńnia etapu vyłučeńnia, na pieršaj pałasie (z praciaham na 2-j) № 59 rajonnaj haziety «Zara nad Niomanam» nakładam 4105 ekz. za aŭtarstvam hałoŭnaha redaktara Stanisłava Źviaroviča vyjšaŭ artykuł «Hałoŭnaje — kłopat pra ludziej» z Valeryjem Saŭko na kalektyŭnym fota.
Za dzień da hetaha artykuł źjaviŭsia na sajcie haziety, ale datu publikacyi zatym anałahična źmianili.
30.07.2016 U artykule farmalna havorka idzie pra pasiadžeńnie Mastoŭskaha rajonnaha kamiteta prafsajuza rabotnikaŭ dziaržaŭnych i inšych ustanoŭ, na jakim, adnak, prysutničali ŭsio toj ža mierkavany kandydat u deputaty Valeryj Saŭko, namieśnik staršyni Mastoŭskaha rajvykankama pa ideałohii Maryna Davydzik, a taksama načalnik adździeła arhanizacyjna-kadravaj raboty rajvykankama Aleh Juško.
№ 59 za 2016/07/30, nakład 4105 eks.
Jak i ŭ vypadku ź pieradvybarnym schodam u Ščučynie, prafsajuzny šabaš u Mastach vykarystoŭvali dla ahitacyi za vyłučeńnie i nastupnaje abrańnie hetaha staŭlenika. Na mierapryjemstvie prysutničali členy inicyjatyŭnaj hrupy pa vyłučeńni, siabry vybarčych kamisij i naziralniki, jakija na terytoryi svajho rajona pavinny zabiaśpiečyć na papiery biezumoŭnuju pieramohu prafsajuznaha kamunista na majučych adbycca vybarach u biełaruski parłamient.
Pryčym redakcyja mastoŭskaj rajonnaj haziety «Zara nad Niomanam» navat nie chavaje taho faktu, što jaje publikacyi na stadyi zboru podpisaŭ vybarščykaŭ źjaŭlalisia ničym inšym, jak ahitacyjnymi materyjałami za vyłučeńnie i nastupnaje abrańnie rehijanalnaha prafsajuznaha lidara Valeryja Saŭko deputatam parłamienta: artykuły ŭ jaho padtrymku, u tym liku «Prafsajuzy zaŭsiody pobač», na sajcie haziety źmieščany ŭ rubryku «Parłamienckija vybary» ŭpieramiežku z paviedamleńniami CVK.
Kiraŭnik CVK Lidzija Jarmošyna na dniach publična zajaviła ab tym, što vybarčyja kamisii buduć źviartać uvahu na najaŭnaść takoha parušeńnia, jak administracyjny resurs, jaki vyjaŭlajecca ŭ złoŭžyvańni słužbovym stanoviščam u intaresach vyłučeńnia i abrańnia ŭ toj pieryjad, kali adbyvałasia vyłučeńnie. Pa vynikach buduć prymać rašeńnie ab admovie ŭ rehistracyi albo ab rehistracyi kandydata ŭ deputaty.
I sapraŭdy, akruhovaja vybarčaja kamisija Ščučynskaj vybarčaj akruhi № 60 vielmi ŭvažliva vyvučyła ŭsie fakty ŭžyvańnia Valeryjem Saŭko i ŭ jaho intaresach administracyjnaha resursu, u čym asabista ŭdzielničaŭ, jak minimum, adzin z členaŭ samoj AVK Juryj Pašuk, i pryniała rašeńnie… ab rehistracyi jaho kandydatam u deputaty.
Biez usialakich sumnievaŭ, što siabru partyi KPB i rehijanalnamu prafsajuznamu dziejaču Valeryju Saŭko pieršapačatkova pavinna było być admoŭlena ŭ rehistracyi jaho kandydatam u deputaty adrazu na niekalkich padstavach. Adnak fakt pieršapačatkovaj rehistracyi nie aznačaje, što dadzienaja rehistracyja ŭ dalejšym nie moža być admieniena pa rašeńni samoj akruhovaj kamisii, abłasnoj albo Centralnaj kamisijaj, jakija majuć prava zrabić heta navat biez papiaredniaha papiaredžańnia na padstavie č. 2 art. 70-1 i č. 1 art. 68-1 Vybarčaha kodeksa Respubliki Biełaruś.
Z boku zhadanaj słužbovaj asoby, jakaja vyłučaje adnačasova mietadam zboru podpisaŭ i ad palityčnaj partyi KPB, u najaŭnaści nieadpaviednaść paradku vyłučeńnia patrabavańniam Vybarčaha kodeksa, a mienavita vykarystańnie pieradvybarnaj ahitacyi, zabaronienaj na stadyi vyłučeńnia, u tym liku ŭ nieadnarazovym vyrabie ŭ jaho intaresach drukavanaj i inšaj pradukcyi, jakaja źmiaščaje prykmiety pieradvybarčaj ahitacyi i pryznačanaj dla masavaha raspaŭsiudžvańnia za košt redakcyj srodkaŭ masavaj infarmacyi kamunalnaj ułasnaści, što finansujucca ź dziaržaŭnaha biudžetu.
U intaresach staršyni Hrodzienskaj abłasnoj arhanizacyi Biełaruskaha prafsajuza rabotnikaŭ dziaržaŭnych i inšych ustanoŭ Valeryja Saŭko na praciahu ŭsiaho etapu vyłučeńnia z 12 lipienia pa 30 lipienia 2016 hoda ŭklučna ŭ abłasnoj haziecie, rajonnych hazietach Mastoŭskaha i Ščučynskaha rajonaŭ, zasnavalnikami jakich źjaŭlajucca abłasnyja, rajonnyja i Hrodzienski haradski vykanaŭčyja kamitety, saviety deputataŭ, pavodle rašeńnia hałoŭnych redaktaraŭ za dziaržaŭny košt vyrablalisia drukavanyja ahitacyjnyja materyjały, ich elektronnyja i radyjoviersii, fotapradukcyja ahulnym nakładam bolš za 100 tysiač asobnikaŭ.
Na schodach, jakija pravodzilisia pad pieršapačatkova łžyvymi padstavami na terytoryi rajonaŭ, jakija ŭvachodziać ŭ adzinuju vybarčuju akruhu, prysutničali namieśniki staršyniaŭ rajvykankamam pa ideałohii, načalniki strukturnych padraździaleńniaŭ pa ideałahičnaj i arhanizacyjna-kadravaj rabocie, siabry akruhovych i ŭčastkovych vybarčych kamisij, siabry inicyjatyŭnych hrupaŭ pa vyłučeńni i abrańni, inšyja asoby, jakija majuć dačynieńnie da arhanizacyi i praviadzieńnia vybaraŭ.
Na hetych mierapryjemstvach, jakija nasili pieradvybarčy charaktar, lidar abłasnoha prafsajuza vystupaŭ z prahramnymi pramovami pa pytańniach, jakija nie adnosiacca da statutnych metaŭ nazvanaha prafsajuza i nie ŭvachodziać u kampietencyju dadzienaj asoby jak jaho kiraŭnika. Usia hetaja dziejnaść padrabiazna aśviatlałasia rehijanalnymi ŚMI.
Aktyŭnaja palityčnaja dziejnaść prafsajuznaha dziejača i pa sumiaščalnictvie mierkavanaha kandydata ŭ deputaty na praciahu ŭsiaho etapu pa jaho vyłučeńni aśviatlałasia na aficyjnych sajtach i ŭ kožnym numary rajonnych haziet vybarčaj akruhi ź pieryjadyčnaściu dva razy na tydzień, časam pa dva artykuły ŭ adnym numary.
Častka padobnych materyjałaŭ adkryta nasiła ahitacyjny charaktar, što navat nie chavałasia žurnalistami i kiraŭnikami redakcyj dziaržaŭnych drukavanych ŚMI: u artykułach pakazvałasia, što Valery Saŭko vyłučajecca kandydatam u deputaty, adkryta paviedamlałasia jaho słužbovaje stanovišča ŭ abłasnoj arhanizacyi respublikanskaha prafsajuza, aśviatlałasia dziejnaść inicyjatyŭnaj hrupy i pikietaŭ pa zbory podpisaŭ u padtrymku jaho vyłučeńnia. Rabotnikami ŚMI ŭ čytačoŭ naŭmysna farmavałasia niapravilnaje ŭjaŭleńnie ab vysokich jakaściach praŭładnaha kandydata, jaho šyrokaj papularnaści ŭ roznych katehoryj vybarščykaŭ.
U toj samy čas jak spres adsutničali publikacyi, jakija b paralelna aśviatlali dziejnaść inšych pretendentaŭ.
Valeryj Saŭko nie moh nie razumieć, što jaho dziejańni i dziejańni inšych słužbovych asob dziaržaŭnych orhanaŭ i arhanizacyj, hramadskich abjadnańniaŭ u intaresach jaho vyłučeńnia i vybrańnia nosiać zaviedama niezakonny charaktar, supiarečać patrabavańniam Vybarčaha kodeksa, parušajuć asnovatvorny pryncyp roŭnaści ŭsich kandydataŭ, bo da niadaŭnich časoŭ na praciahu doŭhaha času jon źjaŭlaŭsia niaźmiennym staršynioj Hrodzienskich abłasnych vybarčych kamisij pa vybarach prezidenta, deputataŭ Pałaty pradstaŭnikoŭ, členaŭ Savieta respubliki, deputataŭ miascovych Savietaŭ roznych sklikańniaŭ.
U jaho dziejańniach prahledžvajecca ŭdzieł administracyj arhanizacyj, u tym liku prafsajuznych piarvičak, u zbory podpisaŭ vybarščykaŭ, a taksama maje miesca vykarystańnie ŭsich pieravah słužbovaha stanovišča ŭ intaresach vyłučeńnia i vybrańnia, praduhledžanych č. 1 art. 73 Vybarčaha kodeksa:
— pryciahnieńnie asob, jakija znachodziacca ŭ padparadkavańni ci inšaj słužbovaj zaležnaści, dla ažyćciaŭleńnia ŭ pracoŭny čas dziejnaści, jakaja spryjaje vyłučeńniu i (abo) abrańniu;
— vykarystańnie pamiaškańniaŭ, zajmanych dziaržaŭnymi orhanami, arhanizacyjami, dla ažyćciaŭleńnia dziejnaści, jakaja spryjaje vyłučeńniu i (abo) abrańniu;
— vykarystańnie telefonnaj i inšych vidaŭ suviazi, arhtechniki, pryznačanych dla zabieśpiačeńnia funkcyjanavańnia dziaržaŭnych orhanaŭ, arhanizacyj, dla ažyćciaŭleńnia dziejnaści, jakaja spryjaje vyłučeńniu i (abo) abrańniu;
— biaspłatnaje abo na lhotnych umovach vykarystańnie transpartnych srodkaŭ, jakija znachodziacca ŭ dziaržaŭnaj ułasnaści, dla ažyćciaŭleńnia dziejnaści, jakaja spryjaje vyłučeńniu i (abo) abrańniu;
— praviadzieńnie zboru podpisaŭ vybarščykaŭ, pieradvybarnaj ahitacyi ŭ chodzie słužbovych kamandzirovak.
Voś tolki Vybarčy kodeks napisany tak, što z usiaho pieraličanaha abaviazkovymi padstavami dla admieny rehistracyi źjaŭlajucca tolki nieadpaviednaść paradku i patrabavańniaŭ da vyłučeńnia kandydata.
Vykarystańnie ž pieravah słužbovaha stanovišča ŭ intaresach vyłučeńnia i ŭdzieł administracyi arhanizacyi ŭ zbory podpisaŭ vybarščykaŭ źjaŭlajecca pravam admovy ŭ rehistracyi albo admieny rehistracyi, a nie abaviazkam Centralnaj i nižejšych vybarčych kamisij. Fakt vykarystańnia słužbovaha stanovišča ŭ intaresach vyłučeńnia i abrańnia praŭładnych kandydataŭ nie źjaŭlajecca biezumoŭnaj padstavaj dla admovy ŭ ich rehistracyi albo nastupnaj admieny rehistracyi ŭ toj samy čas, jak apazicyjnym i niezaležnym vyłučencam vybarčyja kamisii pa ŭsioj krainie ŭ masavym paradku admaŭlajuć u rehistracyi pa lubych niaznačnych pryčynach.
Na dadzienym prykładzie vykryštalizavałasia i inšaja surjoznaja prablema ŭ pytańni sumlennaści praviadzieńnia vybaraŭ.
Dobraja pałova Hrodzienskaj abłasnoj vybarčaj kamisii składajecca z pradstaŭnikoŭ Hrodzienskaha abłasnoha abjadnańnia prafsajuzaŭ. Tolki Haradzienskaja abłasnaja arhanizacyja prafsajuza rabotnikaŭ dziaržaŭnych i inšych ustanoŭ, čyj kiraŭnik bałatujecca ŭ parłamient, vyłučyła 55 svaich pradstaŭnikoŭ u skład učastkovych vybarčych kamisij pa vybarach deputataŭ Pałaty pradstaŭnikoŭ. I heta nie ŭličvajučy šmatlikich pradstaŭnikoŭ ad rajonnych kamitetaŭ prafsajuzaŭ…
Vybary ŭ parłamient z samaha ich pačatku uładaj pieratvoranyja ŭ fars, dzie vam i vašym kandydatam adviedziena rola statystaŭ i maryjanietak, jakija zabiaśpiečvajuć bačnaść demakratyčnaha vybaru naroda!
