Dla Parku minijaciur zamkaŭ i chramaŭ Vialikaha Kniastva Litoŭskaha nabytaja adna ź dźviuch nieabchodnych 3D-drukarak. Hrošy na prynter byli sabranyja ŭ ramkach kraŭdfandynhavaj kampanii na płatformie Talaka.by. Svaje achviaravańni ŭnieśli kala 70 čałaviek. Novy pryntar dapamoža paskoryć pracu nad stvareńniem Parku minijaciur.
«Novy 3D-pryntar značna bolš mahutny i pradukcyjniejšy za papiaredni. Kali ŭ našaj pieršaj drukarcy pamiery pracoŭnaj kamiery składali 20Ch20Ch20 sm, to ŭ novym - 30Ch30Ch40 sm. Dla razumieńnia, my nadrukavali Kamianieckuju viežu na staroj drukarcy z 36 elemientaŭ. Na novaj heta kolkaść skaraciłasia b da 12 elemientaŭ, h.zn. u try razy. Heta dazvolić nam paskoryć druk zamkaŭ, i skarocić raschod materyjałaŭ», — rastłumačyŭ dyrektar fondu «Kraina zamkaŭ» Aleś Varykiš.
Ciapier viadziecca adładka abstalavańnia i ŭ bližejšy čas jano budzie zapuščana ŭ ekspłuatacyju. Novy 3D-prynter byŭ sabrany ŭ Rasii, u Krasnajarsku. «Dla toj kolkaści minijaciur, jakoje my sabie namiecili, dźviuch najaŭnych drukarak niedastatkova. Tamu my praciahvajem zbor srodkaŭ na nabyćcio jašče adnoj drukarki », - adznačyŭ kiraŭnik «Krainy zamkaŭ».
Miarkujecca, što nastupny pryntar, jaki maje namier nabyć fond «Kraina zamkaŭ», budzie ŭžo ajčynnaj zborki. «My supracoŭničajem z adnoj biełaruskaj firmaj, jakaja dapamahła nam u kupli drukarak i materyjałaŭ. Hetaja firma pracuje nad stvareńniem ułasnaj madeli 3D-drukarki. Jana budzie jašče bolš mahutnaja, jašče pradukcyjniejšaja. Cana jaje davoli vialikaja, ale dla našaha prajekta raspracoŭščyki hatovyja dać surjoznuju źnižku», - padzialiŭsia Aleś Varykiš.
Ab zbory srodkaŭ na nabyćcio dvuch dadatkovych 3D-drukarak fond «Kraina zamkaŭ» abviaściŭ u kancy lipienia. U ramkach hetaj kampanii miarkujecca sabrać bolš za 11 tys. rubloŭ. Na siońniašni dzień užo sabrana 65% nieabchodnych srodkaŭ.
27 žniŭnia ŭ šlachieckim falvarku Radzievičy adbudziecca prezientacyja prajekta «Park minijaciur zamkaŭ i chramaŭ VKŁ». Na joj haściam buduć pradstaŭleny kancepcyja parku, niekalki minijaciur, a taksama 3D-drukarki. U prezientacyi voźmuć udzieł dziejačy biełaruskaj kultury: viadomy muzyka Źmicier Vajciuškievič, teatralny režysior Valeryj Mazynski, aŭtar i viadučy «Padarožžaŭ dyletanta» Jury Žyhamont. Hienieralnaje adkryćcio parku namiečana na travień-červień 2017 hoda.
