Pieršy matč suprać «Astany» skončyŭsia ź likam 2:0 na karyść kazachaŭ. Značycca, u hulni ŭ adkaz barysaŭčanie musili adyhrać hetuju roźnicu, dy jašče i biez traŭmavanych Siarhieja Vieramko i Alaksandra Hleba.
Ad pačatku hulni BATE cisnuŭ na supiernika, nieŭzabavie sierb Mirka Ivanič vyjšaŭ adzin na adzin z hałkipieram, adnak vydatnaj mahčymaściu nie skarystaŭsia, pakaciŭšy miač pobač z štanhaj.
Na 27-j chvilinie cisk BATE daŭ plon — daŭnim strełam adznačyŭsia Michaił Hardziajčuk. Halavaja pieradača na rachunku Alaksieja Ryasa.
Da kanca pieršaha tajma barysaŭskaja ataka praciahvała napružvać «Astanu», i zdavałasia, što pieramoha na adlehłaści vyciahnutaj ruki.
Ale jak vyjaviłasia, heta była tolki iluzija.
U pierapynku trenier kazachaŭ zrabiŭ adrazu dźvie zamieny, i kamanda pierastroiłasia. Užo na 49-j chvilinie sierbski lehijanier «Astany» Niamańja Maksimavič skarystaŭsia padačaj z vuhłavoha i nie pakinuŭ šanca bramniku BATE Antonu Saroku. Paśla takoha barysaŭčanam treba było pieramahać jak minimum ź likam 4:1… Kamanda praciahvała atakavać, ale bieź impetu, niby zrazumieŭšy marnaść hetych sprobaŭ.
«Astana» ž dziejničała na kontraatakach. Kančatkova dabić biełarusaŭ im dapamoh štrafny ŭdar. Na 77-j chvilinie Patryk Tvumasi pryhožym strełam pierakinuŭ ścienku. Arciom Saroka nie vyratavaŭ kamandu. Pazicyja bramnika paśla sychodu ŭ francuzski čempijanat Siarhieja Černika zastajecca adnoj z nasłabiejšych.
Usio, na što chapiła BATE, — hoł ź pienalci ad Ihara Stasieviča. Adnak išła ŭžo 89-ja chvilina.
Tym bolš kamanda skančvała hulniu ŭ mienšaści paśla vydaleńnia Ryasa.
Možna apielavać da statystyki (BATE prabiŭ pa varotach 23 razy, «Astana» — tolki 7), saromić kazachaŭ, jakija prymityŭna ciahnuli čas, ale fakt zastajecca faktam: barysaŭski kłub nie zdoleŭ pieramahčy ni razu.
Dla mnohich hulcoŭ BATE hetaja paraza moža stać zaviaršeńniem karjery ŭ kłubie. Kažuć, emacyjny kiraŭnik Anatol Kapski rychtuje maštabnuju pierabudovu.