U 2000-ja kałumbijski ŭrad nanios ciažkija parazy bajevikam-marksistam z hrupoŭki FARC — «Revalucyjnych ŭzbrojenych sił Kałumbii». Parazy prymusili levych radykałaŭ pahadzicca na mirnyja prapanovy zakonnych uładaŭ, paviedamlaje CNN.
Paśla pieramoŭ abodva baki zajavili 25 žniŭnia, što dasiahnuli zhody adnosna spynieńnia bajavych dziejańniaŭ i buduć razam imknucca da «tryvałaha miru».
U pačatku kastryčnika ŭrad praviadzie refierendum, na jakim hramadzianie pavinny prahałasavać «za» ci «suprać» pahadnieńnia z FARC.
Vojski źniščajuć kakainavuju łabaratoryju ŭ džunhlach. Fota cbc.ca
Kali nasielnictva pahodzicca na mir ź levymi, arhanizacyja pačnie vyvad svaich bajevikoŭ z džunhlaŭ. Bajeviki adpraviacca ŭ łahiery dla razzbrajeńnia, jakija buduć znachodzicca pad kantrolem AAN.
Jašče adnym pasrednikam pamiž varožymi bakami budzie katalicki kaścioł, jaki bajeviki-kamunisty zaŭsiody ličyli adnym sa svaich vorahaŭ.
Hrupoŭka «Revalucyjnyja ŭzbrojenyja siły Kałumbii», jakaja atrymlivała padtrymku zbrojaj i finansami ad SSSR i inšych kamunistyčnych krain, zarablała hrošy handlem narkotykami, vykradajučy ludziej za vykup, a taksama prosta katavała i zabivała niazhodnych.
Vialikaja častka kałumbijcaŭ na refierendumie moža prahałasavać suprać miru ź ludźmi, jakich ličać złačyncami, piša BBC.
Demanstracyja suprać sastupak kamunistam. Fota cbc.ca
U hramadzianskaj vajnie, jakaja pačałasia ŭ 1960-ja hady, jak ličycca, zahinuli bolš za 200 tysiač čałaviek, jašče piać miljonaŭ byli vymušanyja pakinuć svaje damy.
Zhodna ź infarmacyjaj ispanskaj haziety El Pais za 2008 hod, vieniesuelski prezident Uha Čavies sprabavaŭ uzbroić kałumbijskich paŭstancaŭ z dapamohaj Biełarusi. Hetyja mierkavańni zasnavanyja na dakumientach, znojdzienych u kampjutary zabitaha lidara FARC.