Supracoŭniki adździeła kryminalnaha vyšuku Maskoŭskaha RUUS Minska raskryli razbojny napad na 28-hadovaha nastaŭnika ihry na saksafonie adnoj sa staličnych muzyčnych škoł.
Jak paviedamili ŭ Maskoŭskim RUUS, złačynca trapiŭ u kvateru muzykanta pa źniešniaj hazavaj trubie praz pryadčynienaje płastykavaje akno na kuchni. Znachodziačysia na kuchni i sprabujučy znajści kaštoŭnyja rečy, jon razbudziŭ haspadara kvatery, adnak heta rabaŭnika nie źbiantežyła. Ubačyŭšy ŭ pamiaškańni mužčynu, jon schapiŭ sa stała nož i staŭ patrabavać hrošy i kaštoŭnaści. Atrymaŭšy žadanaje (550 dalaraŭ ZŠA), paprasiŭ vypuścić jaho praz uvachodnyja dźviery i ŭciok.
U chodzie praviadzieńnia apieratyŭna-vyšukovych mierapryjemstvaŭ asoba złačyncy była vyśvietlenaja. Napadnikam akazaŭsia 33-hadovy raniej sudzimy žychar Miadzielskaha rajona, jaki na momant ździajśnieńnia złačynstva ŭžo adbyvaŭ pakarańnie za raniej ździejśnienaje chulihanstva ŭ kałonii adkrytaha typu ŭ Viciebskaj vobłaści i byŭ adpuščany ŭ čatyrochdzionny adpačynak. Mužčyna zatrymany.
Maskoŭskim RASK u dačynieńni da jaho raspačataja sprava na padstavie č. 2. art. 207 KK (razboj). Jamu moža pahražać da 15 hadoŭ pazbaŭleńnia voli z kanfiskacyjaj majomaści.
