Uviečary 5 vieraśnia Viarchoŭny sud ahučyŭ rašeńnie pa spravie «błohiera Matolki suprać BT».
Sudździa Viarchoŭnaha suda Viktar Koŭšun vyrašyŭ, što fotazdymki błohiera — usio ž nie vynik tvorčaj dziejnaści. Adpaviedna, i aŭtarskija pravy na ich nie raspaŭsiudžvajucca. Pazoŭ Matolki i patrabavańni spahnać z BT 1 kapiejku kampiensacyi nie zadavolili.
Pradstaŭnikoŭ Biełteleradyjokampanii na abviaščeńni rašeńnia suda nie było.
Nahadajem, što Anton Matolka pajšoŭ u sud paśla taho, jak jahonyja fotazdymki paŭnočnaha źziańnia pakazali ŭ navinach na kanale «Biełaruś 1». Dazvołu na vykarystańnie fatahrafij u błohiera nichto nie spytaŭ. A kali Anton napisaŭ list u dyrekcyju Biełteleradyjokampanii, to zamiest vybačeńniaŭ atrymaŭ adpisku ad Hienadzia Davydźki, u jakoj śćviardžałasia, što «ŭsio ŭ paradku». Tady Matolka vyrašyŭ sudzicca.
Spačatku jon chacieŭ spahnać z BT bolš za 20 miljonaŭ «starych» rubloŭ, adnak potym paprasiŭ, kab jamu spłacili 1 rubiel. Paśla denaminacyi Matolka zajaviŭ, što choča atrymać ad telekampanii 1 kapiejku. Takaja nievialikaja suma źviazanaja z tym, što błohier ličyć praces pakazalnym, i, śćviardžaje jon, asnoŭnaja meta była nie zarabić, a «nahadać, što kraści zdymki — niadobra».
Toj samy zdymak Matolki
Ekśpiert, da jakoha źviarnulisia, kab pravieści mastackuju ekśpiertyzu fotazdymkaŭ, Andrej Čuprynski — zahadčyk kafiedry kinateleapieratarstva fakulteta ekrannych mastactvaŭ Biełaruskaj akademii mastactvaŭ — Matolkavy zdymki tvorčaściu nie pryznaŭ. Sud nie znajšoŭ pryčyn nie daviarać vysnovam ekśpierta.
Da taho ž, Matolka pavinien budzie jašče zapłacić Čuprynskamu za jaho «ekśpiertyzu» 89 rubloŭ 40 kapiejek. Sudovuju pošlinu ŭ 450 rubloŭ taksama pryjdziecca apłacić błohieru.
U kamientary «NN» Anton Matolka skazaŭ, što niečakanaściu rašeńnie suda dla jaho nie stała.
«Nadzieja pieramahčy była, ale kali na minułym pasiadžeńni prakuror pačała pahadžacca z pazicyjaj BT, stała zrazumieła, što šancaŭ u nas nie šmat», — paviedamiŭ błohier.
Rašeńnie suda nabyło moc i nie moža być abskardžanaje.
