U sudzie Pieršamajskaha rajona Minska 8 vieraśnia pačaŭsia praces pa spravie Maksima Subotkina, byłoha dyrektara chakiejnaha kłuba «Dynama».
38-hadovaha Subotkina vinavaciać u złoŭžyvańni słužbovymi paŭnamoctvami, što paciahnuła ciažkija nastupstvy ŭ vyhladzie naniasieńnia škody ŭ asabliva bujnym pamiery, u zavałodańni hrašovymi srodkami kłuba z vykarystańniem słužbovych paŭnamoctvaŭ i ŭ pieravyšeńni ŭłady abo słužbovych paŭnamoctvaŭ.
Pavodle viersii śledstva, Subotkin skupiŭ usie akcyi ZAT «Arena-miedyja», jakoje paśla pierajmienavali ŭ ZAT «Markietynh-CHK «Dynama», takim čynam prymajučy ŭsie rašeńni. Štatnych supracoŭnikaŭ u «Markietynhu» nie było, adnak «dziejničała» pradpryjemstva davoli aktyŭna.
Štomiesiac Maksim Subotkin atrymlivaŭ 45 miljonaŭ rubloŭ jak staršynia naziralnaha savietu ZAT «Markietynh-CHK «Dynama». Pry hetym pratakoły z pasiadžeńniaŭ savieta Subotkin falsifikavaŭ — nijakich pasiadžeńniaŭ nie pravodziłasia.
Taksama ad imia chakiejnaha kłuba Subotkin padpisvaŭ fiktyŭnyja akty — naprykład, ab tym, što «Markietynh» nibyta padbiraŭ pradaŭcoŭ dla vyjazdnoha handlu padčas čempijanatu śvietu pa chakiei ŭ 2014 hodzie. Taksama «Markietynh» rehularna «stryh» hrošy za pradastaŭleńnie «rekłamnych pasłuh i raźmiaščeńnie rekłamnaj pradukcyi». Praściej kažučy, pradpryjemstvy zamaŭlali rekłamu ŭ časopisie CHK «Dynama», ale hrošy pieraličvali nie kłubu, a na rachunak «Markietynha».
Akramia taho, śćviardžaje śledstva, Subotkin zaklučyŭ damovu sa svaim znajomym, jaki nibyta pavinien byŭ pravieści pieramovy sa šviedskaj firmaj ab pastaŭkach suvienirnaj pradukcyi dla handlu na čempijanacie śvietu pa chakiei ŭ 2014 hodzie. Ale ž pamiž kłubam i toj firmaj damova daŭno była padpisanaja, i pieramovy byli nie patrebnyja. Ich i nie było, ale praz Subotkina toj znajomy atrymaŭ za košt kłuba premiju pamieram bolš za 200 miljonaŭ «starych» rubloŭ.
Taksama razam ź Bieražkovym Subotkin realizavaŭ jašče adnu schiemu. Znajomy Bieražkova Leanid Sahyndykaŭ byŭ hatovy zaniacca raźvićciom dziciačaha chakieja biaspłatna. Ale Subotkin i Bieražkoŭ pierakanali taho aformicca supracoŭnikam kłuba, paabiacaŭšy, što hrošy, jakija buduć vydzialacca na jaho zarobak, pojduć na patreby dziaciej. Sahyndykaŭ pahadziŭsia. Adnak hetyja hrošy išli ŭ kišeni Bieražkova i Subotkina. Toj samy «supracoŭnik Sahyndykaŭ», jaki isnavaŭ tolki na papiery, rehularna atrymlivaŭ zarpłaty i premii, materyjalnuju dapamohu i navat hrošy na kamandziroŭki. Zajavy na adpačynak ad imia Sahyndykava padpisvaŭ sam Subotkin. A na 50-hodździe Sahyndykava Subotkin premiravaŭ jaho — a faktyčna siabie ź Bieražkovym — 4 akładami.
Svaju pazicyju ŭ adkaz na słovy śledstva Subotkin nie ahučyŭ. Jon paprasiŭ zrabić heta paźniej — paśla taho, jak buduć apytanyja śviedki i jon sam daść pakazańni.
Nahadajem, što Maksim Subotkin byŭ zatrymany ŭ kancy lipienia 2015 hoda. Trochi paźniej, u žniŭni, byŭ zatrymany i hienieralny mieniedžar «Dynama» Uładzimir Bieražkoŭ, jakomu było vystaŭlenaje abvinavačvańnie ŭ zavałodańni hrašovymi srodkami kłuba z vykarystańniem słužbovych paŭnamoctvaŭ.
Bieražkoŭ i Subotkin kampiensavali škodu, spłaciŭšy amal 3 młrd rubloŭ, i paprasili vyzvalić ich ad kryminalnaj adkaznaści, źviarnuŭšysia z adpaviednym chadajnictvam da Łukašenki.
U śniežni 2015 hoda Maksim Subotkin, znachodziačysia ŭ SIZA, padaŭ pazoŭ suprać minskaha «Dynama», adkul jon byŭ zvolnieny. Pazoŭ byŭ ab niepravamiernym zvalnieńni i spahnańni kampiensacyi. Ale sud pryniaŭ bok chakiejnaha kłuba.
6 krasavika 2016 hoda Bieražkovu źmianili mieru strymańnia z zaklučeńnia pad vartaj na padpisku ab niavyjeździe, i jon vyjšaŭ na volu. Maksim Subotkin zastajecca pad vartaj.
