Razychodžańnie ŭ dadzienych ab jaŭcy vybarščykaŭ u naziralnikaŭ i ŭčastkovych kamisij nabližajecca da niekalkich sotniaŭ, zajaviŭ BiełaPAN kaardynatar kampanii «Prava vybaru» pa Mahiloŭskaj-Centralnaj vybarčaj akruzie № 85 Vital Makaranka.
«Nadziei, što ciapierašniaja kampanija budzie prachodzić niejak inakš ad papiarednich, nie spraŭdzilisia. Na žal, usio adbyvajecca pa tym ža scenary, jak i na ŭsich papiarednich vybarach, jakija nie byli pryznanyja ni biełaruskaj demakratyčnaj supolnaściu, ni mižnarodnym», - adznačaje kaardynatar pa nazirańni.
Pavodle jaho słoŭ, masavyja prypiski siabrami ŭčastkovych kamisij pačalisia ŭ čaćvier, kali raźbiežki z dadzienymi naziralnikaŭ dasiahali sotni čałaviek. «Naprykład, na 37-m učastku kala 200 čałaviek było prypisana. Na takuju kolkaść nijakaj naziralnik nie moža pamylicca, tym bolš, što naziraje ŭvieś čas, a my ŭ svaju čarhu žorstka kantralujem prysutnaść naziralnika na ŭčastku», - skazaŭ Makaranka.
Pra toje, što na ŭčastku №38 za ŭsie dni papiaredniaha hałasavańnia było prypisana kala 500 hałasoŭ, raskazaŭ BiełaPAN i niezaležny naziralnik Alaksiej Kołčyn.
«Takija prypiski robiacca dla taho, kab potym adsotkaŭ 90 hałasoŭ daterminova prahałasavaŭšych prypisać praŭładnym kandydatam. Na žal, takaja praktyka była ŭ minułyja hady i jana vidavočna vykarystoŭvajecca ciapier», - ličyć Vital Makaranka.
Jon taksama raspavioŭ pra prykłady prymusu da hałasavańnia. «Bačym prymus da daterminovaha hałasavańnia, asabliva studentaŭ. Chodziać cełymi kalektyvami i na pytańnie - čamu iduć, adkazvajuć, što ad tych, chto žyvie ŭ internatach, prosta patrabujuć. Taksama raspaviadali, što źviestki zatym buduć pieradavacca z učastkaŭ, i tyja, chto nie prahałasavaŭ daterminova, buduć pazbaŭlenyja miescaŭ u internatach albo buduć mieć prablemy z vučobaj. Heta - univiersitet Kulašova. albo ŭ niekatorych vypadkach im prapanujuć dadatkovy vychadny za daterminovaje hałasavańnie «, - raspavioŭ kaardynatar naziralnikaŭ.
Jon taksama paviedamiŭ pra pahrozy z boku staršyniaŭ učastkovych kamisij, naprykład, № 49, pazbavić akredytacyi naziralnikaŭ za nibyta stvareńnie pieraškodaŭ u pracy kamisii, choć na samaj spravie, naziralniki prosta padavali skarhi na ubačanyja imi parušeńni. «Šmat ludziej panieśli skarhi ŭ akruhovuju kamisiju. Heta značyć, kali bačym vialikija prypiski, skardzicca ŭ samu ŭčastkovuju kamisiju ŭžo nie maje sensu. My, viadoma, razumiejem jakimi buduć vyniki razhladu hetych skarhaŭ - absalutna nulavyja, ale faktura ŭ nas zastajecca», - adznačyŭ naziralnik.
