Lidery hramadzianskaj kampanii «Havary praŭdu» Taciana Karatkievič i Andrej Dźmitryjeŭ pierakananyja, što realnych ličbaŭ nia viedaje nichto. Ale vykazali zadavalnieńnie, što apazycyja prajšła ŭ parlament, i abviaścili pra pačatak ad siońniašniaha dnia nastupnaj vybarčaj kampanii — prezydenckaj.
Fota Siarhieja Procharava
Na pres-kanferencyi 12 vieraśnia Andrej Dźmitryjeŭ skazaŭ, što pieramoha dvuch apazycyjnych deputataŭ śviedčyć pra toje, što nieabchodna pracavać na budučyniu:
«Napieradzie nas čakaje pośpiech i pieramoha. Treba praciahvać pracavać ź ludźmi. Ludzi kažuć: čamu tak mała dyskusijaŭ? Adsutnaść alternatyŭnych mierkavańniaŭ viadzie da dehradacyi. Tamu nieabchodnyja dyskusii. Voś užo pačalisia abvinavačańni na adras Kanapackaj. Nia treba marnavać siły na pošuki zmovy, treba pracavać. Na akruzie Taciany mieła miesca palityčnaje rašeńnie. U parlamencie moh by być čynoŭnik».
Taciana Karatkievič skazała, što hetyja vybary — krok napierad:
«Źjavilisia novyja palityki, u tym liku i Ania Kanapackaja, jakaja pieramahła. I ja kažu joj: «Ania, ty pavinna ŭziać hety mandat i pracavać. Kali patrebna, ja hatovaja tabie dapamahać».
Kali kazać pra praceduru, u mianie na ŭčastku było šmat parušeńniaŭ, i jany zafiksavanyja. Pieršaje: jak farmavalisia kamisii. Druhoje: jak išoŭ padlik hałasoŭ. Jość fakty, kab abskardzić vyniki. Ale dla nas važny palityčny vynik — dva apazycyjanery trapili ŭ parlament.
Kali b pieramoh kandydat ad čynoŭnikaŭ, ja b padała skarhu ŭžo siońnia. Ale nia budu. Spadziajusia, Hanna prymie hety deputacki mandat i budzie pracavać u parlamencie. Kali Ania — deputat, ja jak žychar jaje akruhi budu padtrymlivać jaje».
Taciana Karatkievič raspaviała, što jana vyjhrała tolki na adnym učastku, dzie naziralnikam była jaje maci.
Na pytańnie, chto vyjhraŭ, chto prajhraŭ i ci źmiryłasia jana z projhryšam, Taciana Karatkievič adkazała:
«Ja nia vyjhrała, ale my nie prajhrali. U nas jość dva alternatyŭnyja deputaty».
Na pytańnie, ci pryjduć pradstaŭniki «Havary praŭdu!» na płošču ŭviečary 12 vieraśnia, Andrej Dźmitryjeŭ adkazaŭ, što nie.
«Niepadrychtavanyja, małakolkasnyja akcyi tolki škodziać spravie. Nu, pryjdzie sotnia čałaviek… Takimi akcyjami my nakiroŭvajem pasył vybarcam: nas mała. Ale nasamreč — nas šmat. Tak što treba žyć i pracavać dalej.
My ad samaha pačatku kazali, što, niahledziačy na vyniki vybaraŭ, my budziem vykonvać svaje abiacańni. Siońnia ludziej cikavić nia płošča, a chvaluje proćma sacyjalnych pytańniaŭ.
Tak, my siońnia nie pieramahli. Ale my pieramožam zaŭtra. Hołas možna skraści, a padtrymku ludziej zabrać niemahčyma».
