Fota Siarhieja Hudzilina
U Minsku prajšła pres-kanfierencyja Hanny Kanapackaj, jakaja pieramahła na vybarach u Pałatu pradstaŭnikoŭ pa staličnaj 97-j Kastryčnickaj akruzie. Jana nabrała 23,7% hałasoŭ. Za Alaksandra Drožžu, jakoha ličyli kandydatam ad ułady, prahałasavali 21,0%.
Pieršuju pres-kanfierencyju deputatka ad AHP vyrašyła pravieści ŭ kanfierenc-zale hatela «Manastyrski» ŭ Vierchnim horadzie. Aproč jaje samoj u mierapryjemstvie ŭziali ŭdzieł staršynia AHP Anatol Labiedźka i pres-sakratar partyi Hanna Krasulina.
Pieršy dzień paśla abrańnia Hanna Kanapackaja nie dała intervju nivodnamu vydańniu. Siońnia byli pieršyja kantakty z presaj i prajšli jany ŭ ramkach ahulnaj pres-kanfierencyi.
Pieršym słova ŭziaŭ Anatol Labiedźka, jon havaryŭ pa-biełarusku. Labiedźka pavinšavaŭ usich z vynikami, jakija ahučyli mižnarodnyja arhanizacyi pa nazirańni. Kiraŭnik AHP zadavoleny, što ni ABSIE, ni ZŠA nie pryznali vyniki spraviadlivymi.
Labiedźka kaža, što ŭčora ŭvieś dzień byli kansultacyi, ci Kanapackaja budzie sama pa sabie ŭ parłamiencie, ci jak častka vialikaj kampanii. «My vyrašyli, što mandat Kanapackaj — heta mahčymaść naviazać novy paradak dnia», — skazaŭ Labiedźka.
«Hanna — suzasnavalnica AHP, jana była na ŭstanoŭčym źjeździe partyi. U jaje byŭ vielmi jarki vystup čatyry hady tamu na parłamienckich vybarach. Jana čałaviek samadastatkovy, idzie ŭ parłamient nie pa zarobak, u jaje jość biznes.
U jaje bliskučaja jurydyčnaja adukacyja, dobra viedaje zamiežnyja movy. Hanna moža być i vuličnym bajcom, jaje pryciahvali da administracyjnaj adkaznaści za akcyi salidarnaści», — dadaŭ staršynia AHP.
«Vielmi pryjemna atrymlivać vinšavańni», — skazała Kanapackaja. Jana adrazu adznačyła, što ŭ Biełarusi niama sumlennych i spraviadlivych vybaraŭ, adnak upeŭnienaja, što pieramahła b i ŭ spraviadlivych.
«Hanna moža za adzin hod zrabić bolej, čym 110 deputataŭ za minułyja 4 hady, jakija prapanavali ŭsiaho try zakonaprajekty», — miarkuje Labiedźka.
«Pra sumlenny padlik hałasoŭ nie davodzicca. Ale ja z upeŭnienaściu mahu skazać, što my byli hatovyja da pieramohi. Ja budu partyjnym deputatam, biezumoŭna. Ja išła na vybary z kamandaj prafiesijanałaŭ. I heta vialikaja pieravaha mianie, jak deputata», — kaža Kanapackaja.
Nakont taho, chto budzie pamočnikam deputata Hanna Kanapackaja jašče nie vyznačyłasia.
Ci budzie im Anatol Labiedźka, sam lidar AHP adkazaŭ: «Pamočnikam ja jašče nie byŭ… Pahladzim».
Baćka Hanny Kanapackaj, viadomy ŭ krainie biznesoviec Anatol Truchanovič, taksama źjaŭlajecca siabram AHP, ci nie budzie ŭ jaho prablem na pracy praz abrańnie dački? «Ja spadziajusia na dapamohu žurnalistaŭ u hetym pytańni». Jana padkreśliła, što publičnaść u takoj situacyi vielmi dapamahaje.
«My zajavim pra siabie i na prezidenckich vybarach», — skazała Kanapackaja na pytańnie, ci budzie jana ŭdzielničać u nastupnych prezidenckich vybarach. Ni tak, ni nie jana nie adkazała.
Kanapackaja ŭvieś čas padkreślivała, što jana pradstaŭnica apazicyjnaj partyi.
Labiedźka kaža, što Kanapackuju davodziłasia ŭhavorvać iści na parłamienckija vybary. Na toj momant, kali jana zhadziłasia ad pravacentrysckaj kaalicyi zastavałasia volnaj u Minsku tolki Kastryčnickaja akruha.
«Ja nie budu admaŭlacca ad dapamohi Taćciany Karatkievič. Ale našy pohlady na situacyju ŭ krainie kardynalna adroźnivajucca, tamu naŭrad ci moža być plonnaje supracoŭnictva», — skazała Hanna Kanapackaja pra svaju supiernicu pa akruzie Taćcianu Karatkievič.
«Ja prafiesijny juryst, u mianie jurydyčnaja kampanija. Maja śpiecyjalnaść —— haspadarčaje prava. Ja pracuju z bujnymi zamiežnymi kampanijami, rablu ŭsio, kab pryciahnuć inviestycyi ŭ krainu», — kaža deputatka pra svaju pracu.
«Biezumoŭna, ja baču adnaho sajuźnika Alenu Anisim, ź jakoj my možam razam padtrymać biełaruskuju movu i kulturu».
«Ja viedaju biełaruskuju movu i spadziajusia ŭ mianie budzie mahčymaść pracavać na joj u parłamiencie», — pa-biełarusku adkazała spadarynia Kanapackaja.
«Vielmi stamiłasia, za apošnija miesiacy vialikaja praca była praroblenaja. Prabačcie, što siońnia była nie nadta šmatsłoŭnaja», — skončyła Kanapackaja pres-kanfierencyju.
