Siabra AHP Hanna Kanapackaja, pieramožca vybaraŭ na 97 Kastryčnickaj akruzie ŭ Minsku, była pryznačanaja, a nie abranaja ŭ parłamient. Pra heta paviedamlaje kampanija «Havary praŭdu», jakaja viała nazirańnie na ŭsich 29 učastkach akruhi z 6 pa 11 vieraśnia.
Adznačym, što na hetaj akruzie vyłučałasia ŭ deputaty adna ź lidaraŭ «Havary praŭdu», eks-kandydat u prezidenty Taćciana Karatkievič. Tamu kampanija vyrašyła zakryć svaimi naziralnikami ŭsie ŭčastki akruhi, akazaŭšysia adzinaj strukturaj, jakaja nadała hetaj akruzie takuju ŭvahu. Ale ŭ vyniku pieramožcam była abjaŭlenaja vyłučenka ad AHP Hanna Kanapackaja.
«Havary praŭdu» piša, što za čas nazirańnia 13 ich naziralnikaŭ byli pazbaŭlenyja akredytacyi abo vydalenyja z učastkaŭ. Takaja ž dola spaścihła i piaciarych davieranych asob kandydataŭ.
— Troje naziralnikaŭ byli vymušanyja admovicca ad nazirańnia z-za administracyjnaha cisku pa miescy vučoby i pracy.
Tym nie mienš, pišuć u kampanii, udałosia skłaści poŭnyja dadzienyja ab nazirańni na 27 učastkach z 29.
U svajoj spravazdačy «Havary praŭdu» piša, što jaŭka na akruzie № 97 była sfabrykavanaja.
— Pavodle dadzienych naziralnikaŭ, u hałasavańni ŭziali ŭdzieł usiaho 40,6% vybarščykaŭ. Byŭ zafiksavany ŭkid amal 12 tysiač biuleteniaŭ. Tolki za košt hetaha ŭkidu tudy aficyjnaja jaŭka skłała 59,7%.
«Havary praŭdu» adznačaje taksama, što tolki na troch z 29 vybarčych učastkaŭ byŭ adkryty i hałosny padlik hałasoŭ.
— Na astatnich naziralniki nie mieli mahčymaści bačyć faktyčny źmiest padličanych biuleteniaŭ.
Kampanija robić zaklučeńnie, što vybary ŭ Kastryčnickaj akruzie № 97 nie adbylisia, a deputat (Hanna Kanapackaja) u hetaj akruzie pryznačany.
— Na žal, try demakratyčnyja kandydaty ŭ akruzie nie zmahli skaardynavać svaju pracu tak, kab mabilizavać ludziej na ŭdzieł u vybarach. Mienavita pasiŭnaść vybarščykaŭ adkryła darohu falsifikaciam u akruzie. Treba damahacca, kab prychilniki mirnych źmien nie adsiedžvalisia ŭ dzień hałasavańnia pa chatach i dačach, a prychodzili na ŭčastki i zabiaśpiečvali svajoj jaŭkaj realnuju pieramohu demakratyčnych kandydataŭ. Tady nijakija machinacyi ź biuleteniami nie dapamohuć uładam skraści hołas naroda.
