Biełaruś hatovaja dapamahčy Małdovie ŭ stvareńni sumiesnych pradpryjemstvaŭ i raźvićci pramysłovaj bazy. Pra heta Alaksandr Łukašenka zajaviŭ 16 vieraśnia na sustrečy z premjer-ministram Małdovy Paŭłam Filipam u Biškieku, paviedamlaje jaho pres-słužba.
president.gov.by
«Vy viedajecie majo ščyraje staŭleńnie da Małdovy. I ŭsio, što ja havaryŭ u čas svajho aficyjnaha vizitu da vas, zastajecca ŭ sile. Navat bolš taho: usio, što vy pažadajecie, my možam; usio, što treba Małdovie, u nas jość», — skazaŭ Łukašenka.
Na sustrečy było adznačana, što ŭ Małdovie ŭžo stvoranyja sumiesnyja pradpryjemstvy dźviuch krain, viaducca raboty pa arhanizacyi novych vytvorčaściej. «Kali vy vybieracie jašče niešta i budziecie zacikaŭleny ŭ pieranosie našaj vytvorčaści ŭ Małdovu, vy nam skažycie, padtrymajcie z boku ŭrada, i ja vam daju harantyju, što my na praciahu maksimum hoda arhanizujem u vas lubuju vytvorčaść, — padkreśliŭ kiraŭnik dziaržavy. — U tym liku my zacikaŭleny ŭ tym, kab i łakalizacyja išła vialikaja. My nie nastojvajem, kab pryvieźli pa častkach traktar i arhanizavali ŭ vas «adviortačnuju» vytvorčaść. Nie, my budziem sadziejničać tamu, kab vyrablać u Małdovie ŭsio, što mahčyma. Hałoŭnaje, kab jakaść pradukcyi była dobraj».
Biełaruś taksama hatova pavialičyć pastaŭki ŭ Małdovu praduktaŭ charčavańnia i naftapraduktaŭ, dapamahać u raźvićci pramysłovaj bazy sielskaj haspadarki, stanka- i mašynabudavańnia. «Pry hetym my nie zacikaŭleny zadzirać ceny. Vy ŭ našaj asobie budziecie zaŭsiody mieć nadziejnych siabroŭ. Ja pierahavaru z premjer-ministram, kab mienavita takoj pazicyi jon prytrymlivaŭsia ŭ čas svajho aficyjnaha vizitu ŭ Małdovu. Hałoŭnaje, kab vy nam skazali, što treba. Usio, što my zmožam zrabić dla vas, my abaviazkova zrobim, prytym jak nichto inšy», — źviarnuŭ uvahu Łukašenka.
Jon dadaŭ, što i rynak Biełarusi adkryty dla małdaŭskaj pradukcyi, u pryvatnaści vinarobnaj. «Hałoŭnaje, kab jana była jakasnaj i pastaŭlałasia biez šerych schiem. Vy viedajecie našu ŭ hetym płanie pryncypovaść», — padkreśliŭ jon.
U svaju čarhu premjer-ministr Małdovy vykazaŭ Alaksandru Łukašenku ŭdziačnaść za sustreču i paćvierdziŭ zacikaŭlenaść krainy ŭ pradaŭžeńni raźvivać partniorstva ź Biełaruśsiu ŭ roznych śfierach. «Paśla taho jak vy naviedali Małdovu, našy adnosiny stali raźvivacca jašče bolš dynamična. Dla nas heta vielmi važna, — zajaviŭ Pavieł Filip. — Uličvajučy tuju chutkaść, ź jakoj my pačali ruchacca, my abaviazkova dabjomsia pośpiechu».
