U pasteryzavanym małace i sasiskach ź Biełarusi vyjavili kišečnuju pałačku, paviedamiŭ Raśsielhasnahlad.
Supracoŭnikami ŭpraŭleńnia viedamstva pa Ćviarskoj i Pskoŭskaj abłaściach byli adabrany proby małaka pitnoha pasteryzavanaha 3,2% vytvorčaści AAT «Minski małočny zavod № 1». Tavar pastupiŭ praz punkt pierasiačeńnia dziaržaŭnaj miažy Rasijskaj Fiederacyi na rasijska-biełaruskim učastku, raźmieščanymu vioscy Dałoscy Siebiežskaha rajona Pskoŭskaj vobłaści. 2,2 tony hruzu supravadžalisia vieterynarnym siertyfikatam Mytnaha sajuza. Pry praviadzieńni łabaratornych daśledavańniaŭ prob małaka ŭ ćviarskoj vieterynarnaj łabaratoryi vyjaŭleny bakteryi hrupy kišečnaj pałački.
Taksama nie adpaviadajuć narmatyŭna-techničnaj dakumientacyi sasiski miasnyja «Małočnyja smačnyja» achałodžanyja vytvorčaści AAT «Mahiloŭski miasakambinat». Tavar ahulnaj vahoj 3,6 tony pastupiŭ praz punkt pierasiačeńnia na rasijska-biełaruskim učastku miažy ŭ vioscy Łabok Nievielskaha rajona Pskoŭskaj vobłaści ŭ składzie partyi kaŭbasnych vyrabaŭ i vendžaniny, jakaja supravadžałasia vieterynarnym siertyfikatam Mytnaha sajuza. Pry praviadzieńni łabaratornych daśledavańniaŭ prob pradukcyi taksama byli vydzielenyja bakteryi hrupy kišečnaj pałački i ŭstanoŭlena pieravyšeńnie kolkaści miezafilnych aerobnych i fakultatyŭna-anaerobnych mikraarhanizmaŭ (KMAFAnM). Jak adznačyli ŭ Raśsielhasnahladzie, vysokaje ŭtrymańnie KMAFAnM u praduktach charčavańnia moža pryvieści da charčovaha atručeńnia roznaj stupieni ciažkaści, enterytu, enterakalitu ŭ spałučeńni ź sindromam ahulnaj intaksikacyi, jaki ŭjaŭlaje niebiaśpieku dla zdaroŭja čałavieka.
U viedamstvie zajavili, što robiacca zachady pa spynieńni abarotu nazvanych partyj niebiaśpiečnaj pradukcyi.
