Advakat niamieckaha honščyka Michaela Šumachiera Fieliks Dam zajaviŭ, što siamirazovy čempijon «Formuły-1», jaki atrymaŭ ciažkuju čerapna-mazhavuju traŭmu ŭ kancy 2013 hoda, usio jašče nie moža chadzić samastojna i navat stajać z čužoj dapamohaj.
Hetuju zajavu juryst zrabiŭ u chodzie sudovych słuchańniaŭ u suviazi z pazovam suprać niamieckaha časopisa Bunte.
U 2015 hodzie hety časopis apublikavaŭ artykuł, u jakim havaryłasia, što aŭtahonščyk užo moža chadzić, abapirajučysia na kaho-niebudź, a taksama padymać ruku. Pa słovach Dama, Šumachier nie moža navat stajać pry padtrymcy inšych ludziej.
47-hadovy Michael Šumachier atrymaŭ čerapna-mazhavuju traŭmu, katajučysia na hornych łyžach u Francuzskich Alpach u śniežni 2013 hoda. Paśla traŭmy jon paŭhoda pravioŭ u miedykamientoznaj komie, a ŭ červieni 2014 hoda byŭ vyviedzieny ź jaje i pieraviezieny ŭ reabilitacyjny centr.
Ź vieraśnia 2014 hoda jon praciahvaje lačeńnie doma ŭ Šviejcaryi. Pra jaho stanie viadoma mała, siamja aŭtahonščyka ŭchilajecca ad pytańniaŭ presy.
Paśla publikacyi ŭ časopisie Bunte mieniedžer honščyka Sabine Kim taksama abvierhła infarmacyju z hetaha artykuła, nazvaŭšy padobnyja paviedamleńni biezadkaznymi śpiekulacyjami.
U lutym były kiraŭnik Ferrari Łuka dzi Montedzemoła kazaŭ, što ŭ jaho jość naviny pra stan zdaroŭja Šumachiera i što jany małasuciašalnyja.