Źniešniaja i ŭnutranaja stabilnaść Biełarusi mohuć być padarvanyja, kali nie buduć urehulavany najaŭnyja roznahałośsi z Rasijaj pa cenach na enierhanośbity. Takaja vysnova ŭtrymlivajecca ŭ apublikavanym 21 vieraśnia dakładzie piersanału Mižnarodnaha valutnaha fondu pa ekanamičnaj situacyi ŭ Biełarusi.
U dakumiencie, u pryvatnaści, adznačajecca, što Biełaruś schilnaja da źniešnich i ŭnutranych šokaŭ i vahańniaŭ uzroŭniu davieru, a heta moža pryvieści da kryzisu pad uździejańniem makrafinansavych uzajemasuviaziaŭ.
«Panižeńnie (padvyšeńnie) cen na enierhanośbity moža źnizić (pavysić) tempy rostu i ŭzrovień źniešnieekanamičnaj stabilnaści. Źniešniaja i ŭnutranaja stabilnaść mohuć być padarvanyja, kali nie buduć urehulavanyja najaŭnyja na siońniašni dzień roznahałośsi z Rasijaj adnosna koštaŭ na enierhanośbity», — padkreślivajecca ŭ dakładzie piersanału MVF.
Aceńvajučy patencyjnyja ryzyki, ekśpierty fondu taksama robiać vysnovu, što ŭ vypadku novaha istotnaha źnižeńnia kursu nacyjanalnaj valuty adbudziecca pasłableńnie karparatyŭnych i bankaŭskich bałansaŭ i ŭzroŭniu davieru chatnich haspadarak, što abumoŭlena vysokaj stupieńniu dałaryzacyi, nieadpaviednaściu valutnaj struktury, abmiežavanym dostupam da valutnaj likvidnaści i značnymi vałavymi patrebami ŭ źniešnim finansavańni, jakija składajuć prykładna 18 młrd dołaraŭ ZŠA (35% VUP).
U cełym, na dumku ekśpiertaŭ MVF, karotkaterminovyja makraekanamičnyja pierśpiektyvy dla Biełarusi — praciah ekanamičnaha spadu i ŭstojliva vysoki ŭzrovień inflacyi.
U miežach bazisnaha scenara (z častkovymi karekciroŭkami), jaki byŭ pradstaŭleny piersanałam MVF, tempy ekanamičnaha rostu, jak čakajecca, zastanucca admoŭnymi i ŭ biahučym hodzie (minus 3%), i ŭ nastupnym (minus 0,5%), a adnosna ścipłaje adnaŭleńnie ekanamičnaha rostu pačniecca u 2018 hodzie (plus 0,5%). Pry hetym praces adnaŭleńnia budzie sa spaźnieńniem iści za anałahičnym pracesam u Rasii, što tłumačycca bolš słabymi bałansami i strukturnymi pieraškodami ŭ Biełarusi.
Jak čakaje piersanał MVF, uzrovień inflacyi ŭ Biełarusi na kaniec śniežnia składzie 13% u hadavym vyražeńni. Heta amal na 1 pracentny punkt bolš, čym u papiarednim hodzie, što ŭ asnoŭnym abumoŭlena źnižeńniem abmiennaha kursu i pavyšeńniem taryfaŭ na kamunalnyja pasłuhi. U ramkach bazisnaha scenara miarkujecca, što inflacyja na praciahu nastupnych troch hadoŭ budzie zastavacca ŭ dyjapazonie nizkich dvuchznačnych pakazčykaŭ. U ramkach scenaryja karekciroŭki miarkujecca, što bolš efiektyŭnaje ažyćciaŭleńnie ekanamičnaj palityki dazvolić źnizić uzrovień inflacyi prykładna da 6% da 2020 hoda.
Nahadajem, hazavaja sprečka pamiž Biełaruśsiu i Rasijaj doŭžycca z pačatku 2016 hoda. Minsk nastojvaje na źnižeńni koštu rasijskaha hazu, Rasija z hetym nie zhodnaja i abvinavačvaje biełaruski bok u parušeńni kantraktu. Dla stymulavańnia pahašeńnia doŭhu Maskva ŭ trecim kvartale skaraciła pastaŭki nafty na biełaruskija NPZ. U červieni vice-premjer RF Arkadź Dvarkovič zajaviŭ, što da skaračeńnia pastavak pryviała niedapłata biełaruskaha boku za pastaŭleny pryrodny haz. Jon taksama padkreśliŭ, što Rasija nie pavialičyć pastaŭki nafty ŭ Biełaruś, pakul nie budzie pahašany doŭh za haz.
20 vieraśnia Alaksandr Łukašenka nazvaŭ naciskam z boku Rasii źnižeńnie pastavak nafty ŭ Biełaruś z-za sprečak pa canie na haz, a taksama daručyŭ uradu aptymizavać udzieł Biełarusi ŭ intehracyjnych prajektach.
