Jeŭrapiejski sajuz abviaściŭ ab padvajeńni pakieta dvuchbakovaj dapamohi Biełarusi: z 14,5 miljonaŭ jeŭra ŭ 2015 hodzie da 29 młn jeŭra ŭ 2016 hodzie.
Hetyja srodki pavinny padtrymać namahańni krainy pa ažyćciaŭleńni reformaŭ i pradastavić dadatkovuju dapamohu ŭ śfierach rehijanalnaha raźvićcia i raźvićcia pryvatnaha siektara, kiravańnia mihracyjaj i pradastaŭleńnia prystanišča, a taksama dalejšuju padtrymku Jeŭrapiejskaha humanitarnaha ŭniviersiteta, havorycca ŭ pres-relizie Jeŭrapiejskaj kamisii.
Finansavańnie budzie vydzielena dla sadziejničańnia raźvićciu pryvatnaha siektara (14 młn jeŭra) z dapamohaj padtrymki ŭstojlivaha sacyjalna-ekanamičnaha raźvićcia Biełarusi, zasnavanaha na šyrokim udziele hramadzian. «Nadajučy asablivuju ŭvahu rehijonam ź nizkaj kankurentazdolnaściu, ES padtrymaje inavacyi ŭ metach miascovaha raźvićcia pry šyrokaj uciahnutaści hramadzian. Prahrama padtrymaje raźvićcio miascovych słužbaŭ kansultavańnia biźniesu i, takim čynam, paspryjaje raspaŭsiudžvańniu viedaŭ ab pracy małych i siarednich pradpryjemstvaŭ. Jana taksama paspryjaje pašyreńniu dostupu da finansavańnia dla mikrapradpryjemstvaŭ, małych i siarednich pradpryjemstvaŭ i sacyjalnych pradpryjemstvaŭ», — paviedamlajecca ŭ pres-relizie.
Adznačajecca, što nazvanyja miery taksama dapamohuć Biełarusi adreahavać na rost kolkaści nierehularnych mihrantaŭ (7 młn jeŭra), padtrymaŭšy ŭrad Biełarusi ŭ raspracoŭcy i ŭkaranieńni poŭnamaštabnaj stratehii kiravańnia nierehularnaj mihracyjaj u adpaviednaści ź mižnarodnymi pravami i standartami ŭ halinie mihracyi, što ŭniasie svoj układ u zachavańnie pravoŭ čałavieka i fundamientalnych pravoŭ u halinie nierehularnaj mihracyi. Padtrymku atrymaje Prahrama sadziejničańnia dobraachvotnamu viartańniu i reintehracyi, a taksama budaŭnictva i rekanstrukcyja centraŭ časovaha ŭtrymańnia mihrantaŭ.
Jašče adna inicyjatyva daść Biełarusi padtrymku (6 młn jeŭra) va ŭmacavańni instytutaŭ z dapamohaj ažyćciaŭleńnia strukturnych i instytucyjnych reformaŭ u klučavych śfierach praz umacavańnie patencyjału dziaržaŭnych viedamstvaŭ Biełarusi, a taksama dziaržaŭnych i napaŭdziaržaŭnych pradpryjemstvaŭ u halinie vypracoŭki palityki. Hetaja inicyjatyva taksama budzie sadziejničać stanaŭleńniu naležnaha kiravańnia, justycyi, hiendarnaj roŭnaści i viaršenstva prava. U jakaści novaj formy supracoŭnictva ź Biełaruśsiu budzie prapanavany tvininh.
Akramia taho, ES vydzielić padtrymku Jeŭrapiejskamu humanitarnamu ŭniviersitetu, jaki pracuje ŭ Vilniusie (2 młn jeŭra), tym samym spryjajučy demakratyčnamu raźvićciu ŭ Biełarusi pry dapamozie pradastaŭleńnia maładym biełarusam mahčymaści atrymać niezaležnuju vyšejšuju adukacyju.
U pres-relizie taksama tłumačycca, što admiena ŭ dačynieńni da Biełarusi bolšaj častki abmiežavalnych mier, jakaja adbyłasia 15 lutaha, paciahnuła za saboj šerah stanoŭčych zachadaŭ pa pahłybleńni ŭzajemadziejańnia.
Pryjarytetnyja kirunki padtrymki Biełarusi z boku ES z 2014 pa 2017 hod — heta sacyjalnaja ŭklučanaść (zaniataść, prafiesijnaja adukacyja i padrychtoŭka, padtrymka Jeŭrapiejskaha humanitarnaha ŭniviersiteta), navakolnaje asiarodździe, a taksama miascovaje i rehijanalnaje raźvićcio.
Finansavańnie vydzialajecca pry dapamozie Instrumienta jeŭrapiejskaha susiedstva, asnoŭnaha finansavaha instrumienta ŭzajemadziejańnia ŭ kantekście Jeŭrapiejskaj palityki susiedstva, u tym liku ź Biełaruśsiu.
