Jana pryśviečana 115‑hodździu Maksima Hareckaha.
Jak paviedamiŭ akcior i režysior biełaruskaha radyjo Aleh Viniarski, jaki zapisaŭ dysk, heta aŭdyjokniha — pieršaja interpretavanaja praz radyjomastactva praca Hareckaha. Dysk stvorany pavodle tvora, natatki dla jakoha piśmieńnik napisaŭ u časie Pieršaj impieryjalistyčnaj vajny na froncie, «pad vybuchi snaradaŭ». Hetyja dakumientalna‑mastackija zapiski byli vydadzieny ŭ 1926‑m i pieravydadzieny ŭ 1987 hodzie.
«U svaim tvory Harecki pieradaŭ charaktar čałavieka, jaki papaŭ na vajnu. Dla mianie było samym značnym, što Harecki prychodzić u hetuju atmaśfieru, dzie amal što ŭsie ruskija ludzi, i zastajecca tam biełarusam», — adznačyŭ A.Viniarski.
Pavodle jaho słoŭ, «hety čałaviek uvasablaje saboj jakraz toj typ biełarusa, jakoha my ŭsie prahniem». «Pa‑pieršaje, heta adkrytaść, ščyraść, pa‑druhoje, praŭdzivaść, tamu što jon nie moh schłusić, i treciaja rysa — heta spačuvańnie i miłasernaść da čałavieka», — skazaŭ A.Viniarski. «Varta zaŭvažyć, jak jon stavicca da ludziej inšych relihij i nacyjanalnaściej: jaŭrejaŭ, palakaŭ. Jašče adna rysa, jakaja mnie padałasia, — heta krytyčnaść», — dadaŭ jon.
«Impieryjalistyčnaja vajna — adna z chvalaŭ žyćcia Hareckaha», — adznačyŭ plamieńnik piśmieńnika, viadomy navukoŭca i hramadski dziejač akademik Radzim Harecki.
Pavodle jaho słoŭ, «Zapiski na impieryjalistyčnaj vajnie» pakłali pačatak šerahu tvoraŭ biełaruskaj prozy antyvajennaha kirunku, jaki zatym praciahnuŭ Vasil Bykaŭ.
Jak adznačyŭ litaraturaznaŭca, daśledčyk tvorčaści M.Hareckaha člen‑karespandent NAN Biełarusi Michaś Mušynski, radyjointerpretacyja tvora «Zapiski na impieryjalistyčnaj vajnie» — heta nieabchodnaja pašana dziejnaści vydatnaha dziejača biełaruskaj kultury.
