Błohiera Eduarda Palčysa pieraviali 30 vieraśnia ŭ mienski śledčy izalatar № 1 na vulicy Vaładarskaha.
Pra heta paviedamili bratu Eduarda, jaki chacieŭ addać pieradaču źniavolenamu ŭ turmie Žodzina.
Palčysu šmat listujuć, tamu važna, kab ludzi pisali ŭžo na novuju adresu, kaža svabodzie Viktoryja Palčys, žonka Eduarda. Listy ŭ adkaz piša i sam źniavoleny: učora jana atrymała adrazu try listy, apošni za 18 vieraśnia. U listach jon nia skardzicca na abychodžańnie i charčavańnie, nie hublaje pazytyŭnaha nastroju, kaža Svabodzie Viktoryja.
Advakatka Palčysa Hanna Bachcina bačyła jaho apošni raz u paniadziełak, 26 vieraśnia, abmiarkoŭvała padrychtoŭku da sudu. Jana kazała, što Eduard vyhladaje dobra, ale schudnieŭ.
Praces nad Eduardam Palčysam maje pačacca 14 kastryčnika. Zasnavalnika i aŭtara sajtu 1863x.com, viadomaha pad niknejmam Jhon Silver, abvinavačvajuć u «raspalvańni rasavaj, nacyjanalnaj ci relihijnaj varožaści abo roźni» (č.1 art. 130 Kryminalnaha kodeksu) i «raspaŭsiudzie parnahrafičnych materyjałaŭ» (č.2 art. 343). Za «raspalvańnie varožaści» Palčysu pahražaje aryšt na termin da šaści miesiacaŭ ci abmiežavańnie voli na termin da piaci hadoŭ, a za «raspaŭsiud parnahrafii» — pazbaŭleńnie voli na termin ad 2 da 4 hadoŭ.
Palčys ličyć, što sud Centralnaha rajonu pryniaŭ svajo rašeńnie pra pryznańnie artykułaŭ ekstremisckimi biez daśledavańnia samich artykułaŭ i nakiravaŭ skarhu ŭ Mienski haradzki sud.
Tym časam sajt 1863x «ažyŭ», na im praciahvajuć publikavacca zapisy, padobnyja da raniejšych.
