— Kali pačałasia panika, ja nie adrazu acaniŭ maštab. Dziaŭčaty biehli ŭ bok majoj kramy z krykami: «Tam mužyk ź bienzapiłoj usich reža», — raspaviadaje kp.by Leanid Uśnič, uładalnik kramy ŭ handlovym centry «Jeŭropa» i vidavočca zdareńnia.
Nahadajem, u subotu ŭviečary siudy uvarvaŭsia 17-hadovy padletak. Jon moŭčki schapiŭ pieršuju žančynu, jakaja trapiłasia, i zabiŭ jaje bienzapiłoj, zatym z futarała ad muzyčnaha instrumienta dastaŭ siakieru i pajšoŭ ź joj bić vitryny, napadać na naviedvalnikaŭ. U vyniku - 46-hadovaja pakupnica apynułasia ŭ balnicy.
— Pačuŭšy kryki pra piłu, zajšoŭ u pieršuju kramu, paprasiŭ dać pałku. Heta ŭžo potym, ubačyŭšy hetaha varjata, zrazumieŭ: moj kij suprać jaho siakiery — ništo, - praciahvaje raspaviadać Leanid. — Ale ŭziaŭ pałku i pajšoŭ u bok krykaŭ, ja nie adrazu nadaŭ značeńnie, što dziŭny čałaviek, jaki išoŭ nasustrač, heta i jość mańjak.
Jon bolš nahadvaŭ hieroja komiksaŭ: na hałavie była šapačka jak nosiać palarniki, heta značyć, tolki nos byŭ adkryty, na vačach — harnałyžnyja akulary, jašče na im byli vielizarnyja navušniki dla šumaizalacyi. I tolki potym u ruce zaŭvažyŭ siakieru. Jon nios jaje jak ściah.
Išoŭ moŭčki, upeŭniena. Zzadu jaho biehli mužčyny, u adnaho ŭ rukach było kresła. Heta ŭładalniki mahazinaŭ, jakija sprabavali spynić šalonaha čałavieka, ja jašče kryknuŭ: «Treba vyklikać milicyju! My ničoha ź im nie zrobim!». I tolki ŭ hety momant napadnik jak byccam upieršyniu pačuŭ čužy hołas, paviarnuŭsia i pajšoŭ u bok, pačuŭsia huk bitaha škła — jon raźbiŭ vitrynu.
Leanid tut ža kinuŭsia telefanavać u milicyju, tam užo viedali ab PP i adkazali: «Da vas užo vyjechała niekalki naradaŭ, čakajcie».
- Pryjechali chłopcy na «Nivie», u kaskach, ź pistaletami i my ŭsie razam pabiehli šukać hetaha varjata. Jon užo lažaŭ u pamiaškańni handlovaha centra, niby ŭładalnik kramy udaryŭ jaho kresłam pa hałavie i toj upaŭ. Navat padčas zatrymańnia padletak nie skazaŭ ni słova, asabliva nie supraciŭlaŭsia, - uspaminaje Leanid.
— A ŭ inšaj častcy centra zatrymali mužčynu hadoŭ 30 z krykam: «Heta supolnik!». U jaho na vopratcy była kroŭ: jon akazvaŭ dapamohu paranienaj žančynie i pamyłkova jaho paličyli za druhoha napadnika. Tam ža adrazu paŭstała błytanina, kolki čałaviek było: adzin ci dva. Potym razabralisia, adpuścili.
- Vy viedali zahinułuju žančynu?
- Nahladna, tak. Jana pracavała pradaŭcom darahich akularaŭ u handlovym centry, ale zusim nie ŭ tym miescy, dzie zdaryłasia napad. Siudy jana pryjšła kupić kałhotki, ale na jaje napaŭ mańjak…
Adrazu paśla hetaha žachu jaje haspadar biehaŭ i šukaŭ źnikłuju, pytaŭsia: ci nie bačyŭ chto. Ale tam byŭ taki chaos, moj pradaviec taksama kinuła mahazin adkrytym i ŭciakła chavacca.
A potym jaho paprasili apaznać cieła … Heta była jaho supracoŭnica. U hałavie dahetul nie ŭkładajecca hetaja historyja. Ale jasna adno: čałaviek staranna rychtavaŭsia da napadu, stolki na siabie ŭsiaho nadzieŭ, kab tvar nichto nie apaznaŭ, zahadzia padrychtavaŭ siakieru, bienzapiłu.
***
Nahadajem, što ŭčora ŭ handlovym centry «Jeŭropa» ŭ centry Minska 18-hadovy chłopiec ź bienzapiłoj i siakieraj napaŭ na naviedvalnikaŭ. Adna žančyna była paranienaja, jašče adna zahinuła.
Małady čałaviek 1998 hoda naradžeńnia prynios siakieru ŭ futarale ad muzyčnaha instrumienta, a ŭ ruce trymaŭ bienzapiłu.
Z zaviedzienaj bienzapiłoj jon napaŭ na dźviuch rabotnic HC kala «Tera picy». Adna ź ich zahinuła.
ANT sa spasyłkaj na milicyju ŭ «Navinach» paviedamiła, što heta była supracoŭnica kramy. Jana adyšłasia z pracoŭnaha miesca kupić kałhotki. Paźniej SK paviedamiŭ, što jana 1973 h.n.
Pa fakcie napadu raspačata kryminalnaja sprava, paviedamiŭ siońnia žurnalistam u Minsku pieršy namieśnik staršyni Śledčaha kamiteta Alaksiej Vołkaŭ.
«Pa hetym fakcie zaviedziena kryminalnaja sprava. Jana pryniata da vytvorčaści śledčymi centralnaha aparata Śledčaha kamiteta. Pravodziacca śledčyja dziejańni», — painfarmavaŭ BiełTA Vołkaŭ.
Napadnik byŭ adzin. A čutki pra toje, što napadnikaŭ było niekalki, źviazanyja z tym, što čałavieka bačyli spačatku ź bienzapiłoj, potym ź siakieraj, rastłumačyli ŭ Śledčym kamitecie.
Mierkavanaja siakiera na miescy zdareńnia, fota Arcioma Harbaceviča
Milicyja ź miesca zdareńnia paviedamiła padrabiaznaści trahiedyi.
«Małady čałaviek 1998 hoda naradžeńnia ŭ 17:28 pryjšoŭ u HC «Jeŭropa». Jon byŭ dobra apranuty, u jaho byŭ čachoł dla hitary, u jakoj była siakiera, a pry sabie bienzapiła. Jon zaviedzienaj bienzapiłoj pryčyniŭ cialesnyja paškodžańni dziaŭčynie, jana pamierła. Potym rasšpiliŭ čachoł, dastaŭ siakieru i pačaŭ pahražać pakupnikam. Hramadzian było niašmat, try-čatyry čałavieki.
U 17:34 pastupiŭ pieršy zvanok u dziažurnuju častku HUUS,
u 17:35 prybyŭ pieršy narad…
U 17:38 napadnik byŭ zatrymany. Jon znachodzicca ŭ dziažurnaj častcy RUUS».
Zajava milicyi (videa)
Cieła zahinułaj lažyć na pieršym paviersie HC «Jeŭropa», kala ŭvachodu ŭ kaviarniu. Jano bačnaje z vulicy tolki z adnaho rakursu — na aśvietlenym łapiku padłohi miž stałami.
Nasupierak čutkam pieršych chvilin, paviedamlaŭ karespandent NN, hałava achviary nie była adrezanaja. Na padłozie była vidać kroŭ. Terytoryju vakoł cieła vyvučali śledčyja — niekalki čałaviek u cyvilnym.
Śledčy kamitet pačaŭ kryminalnuju spravu pa č.2 art.139 KK «Zabojstva».