skrynšot ź videa, sk.gov.by
Učora, dzieści ŭ 17.20, u budynak handlovaha centra uvajšoŭ małady čałaviek. Za plačyma ŭ jaho byŭ futlar dla hitary, u jakim, jak paźniej vyśvietliłasia, była siakiera. U levaj ruce — zaviedzienaja bienzapiła.
Prajšoŭšy kala 50 mietraŭ, jon źniaŭ futlar, pakłaŭ na kanapu, dzie siadzieli dźvie žančyny. Kali žančyny stali sychodzić, padletak nanios adnoj ź ich u śpinu niekalki udaraŭ zaviedzienaj bienzapiłoj. Žančyna ŭpała, a chłopiec, adkinuŭšy bienzapiłu, jakaja zahłuchła, dastaŭ siakieru i nanios jašče try ŭdary. U vyniku atrymanych traŭmaŭ, žančyna pamierła na miescy.
Paśla hetaha padletak ź siakieraj zajšoŭ u piceryju, dzie nanios dva ŭdary adnoj z naviedvalnic. Paśla hetaha, prachodziačy pa kalidory, jon sutyknuŭsia z prybiralnicaj — jon sprabavaŭ trapić joj u hałavu, ale jana zdoleła uchilicca, i ŭdar pryjšoŭsia pa ruce.
«Kali napadnik ruchaŭsia pa kalidorach centra, jaho pastajanna pieraśledavali ad 5 da 15 čałaviek, jakija sprabavali jaho spynić — kidali ŭ jaho urny, kresły. Chacieŭ by vykazać svaju padziaku tym ludziam, jakija sprabavali jaho zatrymać», — adznačyŭ Vołkaŭ.
Jon taksama raspavioŭ, što padletak byŭ zatrymany pry dapamozie naviedvalnikaŭ centra i pradaŭcoŭ.
«Što tyčycca taho, ci zatrymlivała jaho achova … Heta pad pytańniem. Na videa supracoŭnikaŭ achovy centra my nie ŭbačyli. I heta budzie asobnaj padstavaj dla razhladu», — dadaŭ pieršy namieśnik staršyni SK.
«Namier na ździajśnieńnie hetaha złačynstva paŭstaŭ u padletka niezadoŭha da napadu. U ramkach padrychtoŭki da zabojstva jon kupiŭ bienzapiłu, siakieru i srodki abarony pry rabocie ź bienzapiłoj — bałakłavu, masku-šlem, akulary i navušniki», — raspaviali ŭ SK.
U viedamstvie taksama paviedamili, što napadnik — 17-hadovy student adnoj sa staličnych VNU. Jaho siamja - vielmi zabiaśpiečanaja i ščaślivaja, materyjalnych prablem i ciažkaściaŭ nie było. Padletak pražyvaŭ asobna ad baćkoŭ, va ŭłasnaj kvatery.
Śledstvu jon pryznaŭsia, što za try hadziny da napadu vypiŭ 150 hramaŭ harełki. U SK taksama raspaviali, što padletak tak patłumačyŭ svoj učynak: «Chacieŭ pasiekčy ludziej». Pavodle jaho słoŭ, jaho razdražniali zbory ludziej.
U viedamstvie adkazvajuć, što jaho psichičny stan vyklikaje pytańni, ale jakija-niebudź vysnovy buduć rabić śpiecyjalisty - i tolki paśla praviadzieńnia psichołaha-psichijatryčnaj ekśpiertyzy. U padletka taksama ŭziatyja analizy — śladoŭ ŭździejańnia psichatropnych abo narkatyčnych rečyvaŭ pakul nie vyjaŭlena.
