«Ja čałaviek internetny, televizar amal nie hladžu, chiba što mulciki i pieradačy pra žyvioł-raślin ź dzietkaj, plus apošni čas, jak źjaviłasia lecišča, — časam kanał «Usad́ba» pra sady-aharody, — piša žycharka Minska Taćciana Raviaka ŭ siabie ŭ fejsbuku. — Voś i ŭčora pieraklučyła na sad-aharod.
Pieršy siužet: rasijanin raspaviadaje, jak na leciščy farmuje prastoru, sychodziačy z pryjarytetu «iskonno russkich» raślin i drevaŭ. Narmalna, padumała: u čałavieka takaja kancepcyja, cikava, zrazumieła. Ale ž pakul jon nie pačaŭ raspaviadać, što vykarčavaŭ usio, pryŭniesienaje z Zachadu, bo Rasiju chočuć razvalić tym, što nasadžajuć (u prostym sensie) raślinami, jakija razburajuć spradviečnaje rasijskaje pryrodnaje asiarodździe…
Spačatku ŭśmichnułasia: tak i baču, jak pa načach zamiežniki-dyviersanty ŭkopvajuć u rasijskija ziemli bulbu ź ciulpanami.
Nastupny siužet: u rasijskaj hłybincy čałaviek raskazvaje i pakazvaje svoj učastak.
Tut, kaža, «izbuška-na-kuŕjich-nožkach» (i praŭda — na sapraŭdnych nožkach, jak na karcinkach), heta chata-čytalnia dla ŭnukaŭ, dzie jany čytajuć tolki našy ruskija kazki i hladziać tolki ruskija mulciki. Sproby Zachadu, kaža, naviazać svaju škodnuju ideałohiju praz svaje Halivudy i kalarovyja knižki jon mocna adčuvaje i robić usio mahčymaje, kab praduchilić ich upłyŭ…
I heta ž nie prapahandysckija prahramy, zatočanyja mienavita na prasoŭvańnie kankretnaj idei, heta — užo žyvoje ŭvasableńnie dziejańnia hetaj prapahandy, kali zvyčajnyja ludzi ŭ svaje štodzionnyja spravy ŭklučajuć elemient baraćby z «tletvornym vlijanijem Zapada», usprymajuć siabie ŭ atačeńni vorahaŭ, ź jakimi zmahajucca lubymi dastupnymi srodkami — vykarčoŭvajuć, budujuć asadnyja izbuški.
Heta ŭžo ŭ hałovach i nie skončycca prostym vyklučeńniem televizara», — robić vysnovu Taćciana Raviaka.
«Toje samaje adbyvajecca z hrupami ŭ sacyjalnych sietkach. Tolki niejkaja robicca papularnaj — jaje biaruć pad kantrol i prasoŭvajuć prapahandu. «Popularnaja miechanika», Fishki — śviežyja prykłady «vatyzacyi», — dadaje ŭ kamientach inšy karystalnik fejsbuka.
