Piać krynic siarod čynoŭnikaŭ raspaviali Znak.com, što ŭ administracyi prezidenta paraili im viarnuć u Rasiju dziaciej i inšych svajakoŭ, jakija navučajucca abo pražyvajuć za miažoj. Niefarmalnaja prośba tyčycca ŭsich čynoŭnikaŭ až da najvyšejšaha ŭzroŭniu.
Liza Piaskova i Dźmitryj Piaskoŭ. Fota ź instahrama Lizy Piaskovaj.
Vydańnie adznačaje, što ŭ vypadku dziaciej, jakija navučajucca za miažoj, čynoŭnikam rekamiendavana pieravieści ich u rasijskuju VNU, nie čakajučy zakančeńnia vučoby. Prośba tyčycca supracoŭnikaŭ dziaržstruktur, uklučajučy samu administracyju prezidenta, rabotnikaŭ dziaržkarparacyj i rehijanalnych administracyj.
Čym tłumačycca terminovaść, nie ŭdakładniajecca. Adnak u vypadku, kali čynoŭniki nie stanuć vyrašać prablemu pieravozu svajakoŭ z-za miažy, im moža być admoŭlena ŭ dalejšych pryznačeńniach i pavyšeńni, adznačaje Znak.com.
Za miažoj vučacca dzieci šmatlikich rasijskich čynoŭnikaŭ, u tym liku vielmi viadomych. U 2012 hodzie Alaksiej Navalny vyjaviŭ, što dočki deputata «Adzinaj Rasii» Siarhieja Žaleźniaka vučylisia ŭ Vialikabrytanii i Šviejcaryi.
Za miažoj vučycca adzin z dvuch dziaciej byłoha dziciačaha ambudsmiena Paŭła Astachava, a druhi byŭ narodžany ŭ francuzskich Kanach. Pavodle dadzienych Znak.com, na rašeńnie ab zvalnieńni Astachava paŭpłyvała i «jeŭraaryjentacyja» jaho siamji.
Znak.com taksama zhadvaje pra syna ministra pramysłovaści Dzianisa Manturava i dačku kiraŭnika MZS Siarhieja Łaŭrova, jakija vučylisia za miažoj i jakija viarnulisia ŭ Rasiju, ale nie piša pra dačku Dźmitryja Piaskova. U žniŭni 2015 hoda Lizavieta Piaskova raspaviadała ŭ intervju «Hazietie.ru», što žyła ŭ Francyi z vaśmi hadoŭ i chacieła b źjechać tudy vučycca, adnak pa žadańni baćki vučycca ŭ MDU. U sakaviku 2016 hoda jana ŭžo niehatyŭna adhukałasia ab rasijskaj adukacyi i śćviardžała, što stała vučycca ŭ Francyi, dzie žyvie jaje maci.
U razmovie z TASS pres-sakratar prezidenta RF Dźmitryj Piaskoŭ zajaviŭ, što nie ŭ kursie pra isnavańnie rekamiendacyi viartać u Rasiju dziaciej, jakija vučacca za miažoj: «Ja takoha nie bačyŭ i nie čuŭ».
