U pracesie ab śmierci na «Vaładarcy» ŭ 2013 hodzie viaźnia Ihara Pcičkina prakuror prosić dla abvinavačanaha felčara Alaksandra Kryłova 3 hady kalonii-pasialeńnia pavodle častki 2 artykułu 162 Kryminalnaha kodeksu — za nienaležnaje vykanańnie słužbovych abaviazkaŭ, jakoje pryviało da śmierci.
Nahadajem, za 20 hadzin, jakija Ihar Pcičkin byŭ pryviazany da łožka, jaho ni razu nie vyvieli ŭ tualet. Jon pamior u SIZA ad sardečnaj niedastatkovaści. (Hł. taksama: Sprava Pcičkina. Pryviazanym da łožka pratrymali amal sutki.)
Prakuror Vadzim Kisiel nazvaŭ siarod asnoŭnych pryčynaŭ, jakija pryviali da śmierci Pcičkina, fiksacyju jaho da łožka, jakuju pryznačyŭ Kryłoŭ niezakonna, i lačeńnie Pcičkina z boku Kryłova «nie ŭ adpaviednaści z pratakołam». Vyniki kompleksnych ekspertyzaŭ pryčyn śmierci Pcičkina prakuror ličyć «supiarečlivymi» i «uzajemavyklučalnymi». Eksperty kazali pra śmierć u vyniku vostraj sardečnaj niedastatkovaści, jakaja raźviłasia ad kompleksu pryčynaŭ, na jakija Kryłoŭ nia moh uździejničać.
Kryłoŭ nie pryznaje siabie vinavatym. Prakuror zajaŭlaje, što Kryłoŭ nie raskajaŭsia. Advakat Kryłova Andrej Michajłaŭ kaža, što niama dokazaŭ, što Pcičkina źbivali, a jahony klijent tolki felčar, ale nia lekar.
Advakat nazvaŭ pravaabaroncaŭ «vorahami», jakija finansujucca CRU. Prysud Kryłovu, pavodle Michajłava, budzie na ich karyść. Jon zaklikaŭ sud Kryłova apraŭdać, a taksama pryciahnuć da adkaznaści prakurora, jaki vioŭ spravu Pcičkina, pa 393 artykule KK — za heta, maŭlaŭ, treba davać 3—10 hadoŭ źniavoleńnia. Prakuror Kisiel nazvaŭ hetyja słovy advakata Michajłava pahrozaj i ciskam na sud.
Pasiedžańnie 14 kastryčnika zavieršyłasia. U paniadziełak a 14:15 apošniaje słova i abviaščeńnie prysudu.
