14 kastryčnika ŭ Pietrykaŭski RAUS pastupiła paviedamleńnie ad kiraŭnictva Kapatkievickaha adździaleńnia suviazi ab nieviadomym źniknieńni paštaljona. 27-hadovaja rabotnica pošty raznosiła piensiju pažyłym žycharam vioski i nie viarnułasia ŭ kancy pracoŭnaha dnia.
Na momant źniknieńnia ŭ žančyny znachodzilisia pry sabie hrašovyja srodki, kala 1500 rubloŭ, dla vydačy piensii, pakiet z hazietami i listami, torba z asabistymi rečami i darožny rovar «Aist».
U chodzie praviadzieńnia apieratyŭna-vyšukovych mierapryjemstvaŭ pravaachoŭnikam trapiłasia niepracujučaja žycharka Kapatkievičaŭ, 1974 hoda naradžeńnia. Pry ahladzie haspadarčaj pabudovy, što joj naležyć, supracoŭniki kryminalnaha vyšuku vyjavili rovar źnikłaj žančyny, pry ahladzie kvatery — pad padłohaj znajšli jaje cieła z bačnymi prykmietami hvałtoŭnaj śmierci, paviedamiła ŭ svaim fejsbuku aficyjny pradstaŭnik SK pa Homielskaj vobłaści Maryja Kryvanohava.
Pry nastupnym ahladzie miesca zdareńnia śledča-apieratyŭnaj hrupaj byli vyjaŭlenyja rečy i hrošy paštaljona, mierkavanaja pryłada zabojstva — siakiera, a taksama inšyja pradmiety, jakija majuć dokaznaje značeńnie.
Pa fakcie zabojstva zaviedziena kryminalnaja sprava. Pa padazreńni ŭ ździajśnieńni złačynstva zatrymana haspadynia kvatery. Ź jaje ŭdziełam praviedzieny pieršapačatkovyja śledčyja dziejańni, u tym liku pravierka pakazańniaŭ na miescy zdareńnia. Da padazravanaj prymieniena miera strymańnia ŭ vyhladzie zaklučeńnia pad vartu.
Pa kryminalnaj spravie stvorana śledčaja hrupa, u skład jakoj uvajšli supracoŭniki Pietrykaŭskaha RASK i śledčaha ŭpraŭleńnia USK pa Homielskaj vobłaści. Śledčyja va ŭzajemadziejańni z supracoŭnikami milicyi i ekśpiertami vyśviatlajuć usie abstaviny zdareńnia.
