Adsutnaść reakcyi łaŭreata Nobieleŭskaj premii pa litaratury 2016 hoda Boba Dyłana na ŭručeńnie jamu samaj prestyžnaj u śviecie ŭznaharody aburyła Nobieleŭski kamitet. Adzin z členaŭ žury papraknuŭ Dyłana, jaki da hetaha času nie adkazaŭ na ŭsie sproby Šviedskaj karaleŭskaj akademii navuk źviazacca ź im, u fanaberyi.
«Treba nazyvać rečy svaimi imionami: tak pavodzić siabie niavietliva i vysakamierna», — zajaviŭ u efiry šviedskaha telekanała SVT piśmieńnik Pier Viestbierh.
Z taho momantu, jak stała viadoma ab prysudžeńni jamu Nobieleŭskaj premii, Bob Dyłan nie adkazaŭ na nivodny zvanok z Šviedskaj akademii, nie daŭ nivodnaha intervju na hetuju temu i navat vydaliŭ sa svajho sajta infarmacyju ab «Nobieleŭskaj premii». Nieviadoma taksama, ci prybudzie jon na ŭračystaje ŭručeńnie ŭznaharod, jakoje adbudziecca 10 śniežnia ŭ Stakholmie.
Vystup Piera Viestbierha staŭ pieršaj publičnaj prajavaj abureńnia Nobieleŭskaha kamiteta. Da hetaha adzinaj reakcyjaj na maŭčańnie Dyłana była abjava ab tym, što Šviedskaja akademija spyniaje sproby źviazacca z muzykam.
Maŭčańnie Boba Dyłana nielha rastłumačyć nieluboŭju da publičnych mierapryjemstvaŭ abo bojaźziu mieć znosiny z presaj, piša Der Spiegel.
Za doŭhija hady svajoj karjery jon prysutničaŭ na ŭručeńni jamu mnostva ŭznaharod, siarod jakich — najvyšejšaja ŭznaharoda Złučanych Štataŭ miedal Svabody, uručanaja muzyku prezidentam ZŠA Barakam Abamam, kinapremii «Oskar» i «Załaty hłobus» i mnostva muzyčnych premij «Hremi».
