Adbyłosia pasiedžańnie padkamitetu pa Biełarusi Parlamenckaj asamblei Rady Eŭropy. U Strasburhu vystupili Labiedźka i Krasucki.
Pieršym trymaŭ słova specdakładčyk pa Biełarusi Andrea Ryhoni. Jon prapanavaŭ da padpisańnia deklaracyju z zaklikam źnizić canu vizaŭ dla biełarusaŭ.
Paśla jaho słova mieŭ deputat pałaty pradstaŭnikoŭ Anatol Krasucki. Jon nazvaŭ sytuacyju ŭ adnosinach Biełarusi i PARE “nienarmalnaj”. Biełaruski bok zrabiŭ niekalki krokaŭ nasustrač. “Šerah asobaŭ, jakim PARE nadavała asablivuju ŭvahu, vyjšli na svabodu”, -- zajaviŭ jon. Jon akcentavaŭ uvahu na ekanamičnych dasiahnieńniach krainy. Skazaŭ, što biespracoŭje ŭ Biełarusi trymajecca na ŭzroŭni 1%, a investycyi ŭ srodki vytvorčaści vyraśli na 27%. Što da pravoŭ čałavieka, to jon zaklikaŭ nie dapuścić, kab hetaje “paniaćcie” stała “pradmietam handlu, spekulacyi ŭ baraćbu za ŭładu”.
Jon źvinavaciŭ PARE ŭ tym, što ad Biełarusi patrabujuć vykanać krytery siabroŭstva dla taho, kab raspačaŭsia minimalny dyjaloh.
U vypadku pačatku hłybšaha dyjalohu, skazaŭ jon, PARE atrymaje nadziejnaha partniora ŭ pytańni demakratyzacyi – parlament “ź jahonym 12-hadovym vopytam”, skazaŭ jon.
Jon padrabiazna raśpisaŭ uviadzieńnie normy pra siabroŭ Centravybarkamu z daradčym hołasam.
Ci budzie krytyka kanstruktyŭnaj, budzie zaležać nie ad nas, zajaviŭ Krasucki.
Jon prapanavaŭ, kab, jak u 1999-2003 hadach, PARE nakiroŭvała zaprašeńni pałacie pradstaŭnikoŭ, a jany pryjaždžali za svoj košt. “Ja ŭžo nie havaru pra status specyjalna zaprošanaha”, adznačyŭ jon. Supracoŭnik pasolstva Biełarusi ŭ Francyi Andrej Sucharenka ŭvažliva na jaho pahladzieŭ.
Cikava, što Krasucki ŭ kuluarach pryznavaŭsia, što jon adbyŭ svoj apošni termin u pałacie pradstaŭnikoŭ.
Za im vystupaŭ Labiedźka.
Svoj vystup jon pačaŭ z Zakonu pra ŚMI. Čamu jon byŭ pryniaty ŭ śpiešnym paradku? – zapytaŭsia jon.
ADS prapanavała źmieny ŭ Vybarčy kodeks. Jany nie byli navat razhledžanyja. Kandydaty nia majuć dostupu ŚMI, nia mohuć navat sustrakacca z vybarcami, praciahvaŭ Labiedźka.
Rada Eŭropa nia miesca dla handlu, papiaredžvaŭ jon. ADS treba nia 2, 3, 10 mandataŭ, a svabodnyja ŚMI i ŭklučeńnie pradstaŭnikoŭ apazycyi ŭ vybarčyja kamisii, a taksama mahčymaści kantrolu naziralnikaŭ za padlikam hałasoŭ.
Labiedźka padtrymaŭ uznaŭleńnie instytutu parlamenckaj “trojki”, u jakuju ŭvachodzili pradstaŭniki PARE i Eŭraparlamentu.
Što da siabroŭ Centravybarkamu z daradčym hołasam, to jany nia buduć mieć nijakaha ŭpłyvu na pryniaćcio rašeńniaŭ, zaznačyŭ lider Abjadnanaj hramadzianskaj partyi.
U sprečkach vystupili taksama Taciana Hacura z Chielsynskaha kamitetu i znoŭ Ryhoni. Apošni nachvalvaŭ pieravahi dyjalohu. “Ale pra što dyjaloh? Što niamožna čałavieka sadzić za ŭdzieł u manifestacyi? Što hałasy na vybarach treba ličyć? Jaki dyjaloh moža być vakoł hetych pytańniaŭ?” – nia vytrymaŭ deputat ad Vuhorščyny.
Na tym i razyšlisia.
Anatol Labiedźka jašče pierahavaryŭ z pasłom Biełarusi ŭ Francyi Paŭłoŭskim. Jak nievyjaznomu, jamu, peŭna, było pra što spytacca ŭ byłoha hałoŭnaha pamiežnika krainy.
