Handbalisty zbornaj Biełarusi atrymali pieršuju pieramohu ŭ adboračnym turniry čempijanatu Jeŭropy - 2018, abyhraŭšy ŭ haściach kamandu Sierbii ź likam 36:27. Paśla chatniaj parazy ad rumynaŭ (23:26) na starcie spabornictvaŭ u 2-j kvalifikacyjnaj hrupie padapiečnym Juryja Šaŭcova abaviazkova treba było nabirać ački ŭ sierbskim Nišy. Biełarusy vydatna spravilisia z hetaj zadačaj, vielmi ŭpeŭniena pravioŭšy matč z mocnym supiernikam. Hości z samaha pačatku paviali ŭ liku i pa chodzie sustrečy ni razu nie dazvolili haspadaram vyjści napierad, zhulaŭšy adzin z najlepšych svaich pajadynkaŭ za apošni čas.
U składzie zbornaj Biełarusi miačy zakidvali: Barys Puchoŭski - 8. Andrej Jurynok, Arciom Karalok - pa 7, Siarhiej Šyłovič - 6, Dźmitryj Nikulenkaŭ - 3, Uładzisłaŭ Kuleš, Dzianis Rutenka - pa 2, Alaksiej Šynkiel - 1. U troch papiarednich sustrečach ź sierbskimi handbalistami zbornaja Biełarusi ciarpieła parazy i zaraz upieršyniu dabiłasia pieramohi.
Turnirnaje stanovišča paśla dvuch turaŭ: Rumynija - 4 ački (roźnica miačoŭ - 54-46), Biełaruś - 2 (59-53), Sierbija - 2 (64-68), Polšča - 0 (55-65). Adboračny turnir kantynientalnaha pieršynstva adnovicca ŭ mai 2017 hoda. U trecim tury zbornaja Biełarusi 3 abo 4 maja prymie na svajoj arenie palakaŭ, a sierby zhulajuć u haściach u kamandy Rumynii.
