Demakratka Chiłary Klintan, jakaja prajhrała prezidenckija vybary ŭ ZŠA, vykazała nadzieju, što abrany prezident ZŠA Donald Tramp stanie paśpiachovym kiraŭnikom dziaržavy. Vystupajučy pierad prychilnikami ŭ Ńju-Jorku, jana jašče raz pryznała svaju parazu i zaklikała dać šaniec Trampu, piša VVS.
Getty
«Donald Tramp budzie našym prezidentam, i my abaviazanyja dać jamu šaniec kiravać krainaj, — zajaviła jana. — Učora ŭviečary ja pavinšavała Donalda Trampa i pahadziłasia pracavać ź im na karyść našaj krainy».
«Mnie škada, što my nie zmahli adstajać svaje kaštoŭnaści na hetych vybarach», skazała byłaja dziaržsakratarka, pryznaŭšysia, što paraza na vybarach stała dla jaje balučaj.
«Heta baluča, i jašče doŭha budzie baluča, ale pamiatajcie: u centry našaj kampanii byŭ nie adzin čałaviek, i navat nie adny vybary», — skazała Klintan.
Klintan zaklikała prychilnikaŭ zmahacca za svaje ideały — sacyjalnuju roŭnaść, raŭnapraŭje i svabodu vieravyznańnia.
«Naš abaviazak jak hramadzian — stvaryć mocnuju, bolš sumlennuju Amieryku», — padahulniła jana, padziakavaŭšy taksama Baraku i Mišel Abamam.
