Kitajskija daktary paśpiachova vyraścili na ruce štučnaje vucha. Pra heta piša Daily Mail sa spasyłkaj na vydańnie Huanqiu.com.
Reuters
Apieracyja, jakaja da hetaha času nie pierajšła ŭ finalnuju stadyju, pravodzicca pad kiraŭnictvam doktara Ho Šučžuna ź lakarni pry Univiersitecie Džaa Tonh u Siani (pravincyja Šeńsi).
Pacyjent — mužčyna pa proźviščy Czi — niekatory čas tamu trapiŭ u avaryju, u jakoj straciŭ pravaje vucha. Akramia hetaha, u mužčyny była źniaviečanaja častka tvaru, i jon pieranios niekalki płastyčnych apieracyj dla adnaŭleńnia skury. Tym nie mienš, viarnuć vucha z dapamohaj tradycyjnaj miedycyny nie ŭjaŭlałasia mahčymym, i Czi źviarnuŭsia da Šučžuna.
huanqiu.com
Doktar vyrašyŭ pravodzić apieracyju ŭ try etapy. Na pieršym pad pravym pieradpleččam Czi ŭstalavali pašyralnik skury. Na druhim lekary vyniali z rebra pacyjenta chrastok, zmadelavali ź jaho formu budučaha vucha i pierasadzili na ruku.
Trecim etapam, jaki jašče nie pravodziŭsia, stanie pierasadka vucha na hałavu mietadam nakładańnia sasudzistaha anastamozu. Pa płanie Šučžuna hetaja častka apieracyi budzie praviedzienaja prykładna praz try-čatyry miesiacy.
Heta nie pieršy padobny vypadak u Kitai. U 2013 hodzie kitajskija navukoŭcy vyraścili novy nos na łbie pacyjenta, u jakoha paśla DTZ u vyniku infiekcyi całkam razburyŭsia chrastok u nosie.