Praz hod paśla atrymańnia Nobieleŭskaj premii Śviatłana Aleksijevič ŭsio ž taki adkryje ŭ Minsku svoj intelektualny kłub. Pieršaja sustreča adbudziecca ŭviečary 7 śniežnia ŭ Halerei TUT.BY. U jakaści hościa ź lekcyjaj «Zło» ŭ Minsk pryjedzie rasijskaja paetka, prazaik, pierakładčyk, fiłołah i etnohraf Volha Siedakova.
Śviatłana Aleksijevič kaža, što nie viedaje joj roŭnych siarod sučasnych ruskich intelektuałaŭ.
— U Volhi vielmi dakładny maralny niuch, jana ŭmieje raniej za inšych farmulavać dumki i prahnazavać budučyniu. Jašče hadoŭ 10 tamu jana arhanizavała lekcyju «Pasrednaść jak sacyjalnaja niebiaśpieka», dzie ŭžo tady pradkazała i pucinizm, i toje, što navierch vylezie ašukany i razzłavany maleńki čałaviek. A vinavatyja ŭ hetym buduć demakraty, — raspaviała TUT.BY Śviatłana Aleksijevič.
Sustrečy ŭ intelektualnym kłubie buduć prachodzić kožny miesiac. Śviatłana Aleksijevič abiacaje, što prachadnych haściej nie budzie. Siarod inšych nobieleŭski łaŭreat abiacaje pryvieźci ŭ Minsk režysiora Alaksandra Sakurava, palityka i hramadskaha dziejača Rasii Irynu Chakamadu, vučonaha-psichalinhvista Taćcianu Čarnihaŭskuju.
— Vielmi važna padniać razmovu na vysokuju płanku. Ja na pieršaj ža sustrečy paprašu, kab u kłubie nie było nijakaj palityčnaj mitynhovaści. Tak my ničoha nie dabjemsia. Važniej ŭbačyć hłybinnyja prablemy i namacać toj padmurak, jaki dapamoža mudramu čałavieku vyžyć. A takija ludzi ŭ nas jość, ale ŭ apošni čas intelektuały adčuvajuć siabie marhinałami, — skazała piśmieńnica.
Lekcyi buduć biaspłatnymi dla słuchačoŭ. Adzinaja ŭmova ŭdziełu — zahadzia zarehistravacca na mierapryjemstva.
