Siońniašnija ŭmovy dazvalajuć prahnazavać źnižeńnie koštu kvadratnaha mietra žylla, jakoje ŭzvodzicca ź dziaržaŭnaj padtrymkaj, da 280 dalaraŭ u ekvivalencie. Pra heta zajaviŭ žurnalistam 30 listapada ŭ Pałacie pradstaŭnikoŭ namieśnik premjer-ministra Anatol Kalinin.
Vice-premjer udakładniŭ, što ŭsiaho ŭ krainie ŭ śpisach, chto maje patrebu ŭ palapšeńni žyllovych umoŭ, znachodziacca bolš za 700 tysiač čałaviek, u tym liku 200 tysiač čarhavikoŭ u Minsku. Pry hetym, zhodna sa statystykaj, na kožnaha žychara Biełarusi prypadaje pa 26,5 kv. m žylla va ŭłasnaści.
«Ustanoŭleny hraničny sabiekošt kvadratnaha mietra ź dziaržpadtrymkaj. Na 2016—2017 hady jon składaje 8,5 młn starych rubloŭ. Ja baču ŭnutranyja reziervy, kab my mahli źnizić hetyja vydatki i prydumać bolš kamfortnyja ŭmovy pa košcie kvadratnaha mietra, u pieršuju čarhu, ź dziaržaŭnaj padtrymkaj. Siońnia heta kala 340 dalaraŭ. Ja liču, što my možam budavać mietr kvadratny žylla ź dziaržpadtrymkaj nie bolš za 280 dalaraŭ ZŠA ŭ ekvivalencie», — zajaviŭ namieśnik premjer-ministra.
Pavodle źviestak Nacyjanalnaha statystyčnaha kamiteta, U Biełarusi ŭ studzieni—kastryčniku 2016 hoda ŭviedziena ŭ ekspłuatacyju 3 młn 517,6 tys. kv. m žylla, što na 18,2% mienš u paraŭnańni z anałahičnym letašnim pieryjadam. Dla hramadzian, jakija stajać na ŭliku dla palapšeńnia žyllovych umoŭ, uviedziena ŭ ekspłuatacyju 1 młn 240,5 tys. kv. m ahulnaj płoščy, abo 35,3% usiaho abjomu ŭviedzienaha žylla. Z ahulnaha abjomu ŭviedzienaha žylla dla hramadzian, jakija stajać na ŭliku dla palapšeńnia žyllovych umoŭ, pabudavana z vykarystańniem dziaržaŭnaj padtrymki 826,8 tys. kv. (na 40,8% mienš).
