Na miescy načnoha zdareńnia ŭ Minsku znojdziena jašče adna — nierazarvanaja — samarobnaja vybuchovaja pryłada, paviedamili BiełaPAN va ŭpraŭleńni infarmacyi i hramadskich suviaziej MUS.
Jak skazaŭ 4 lipienia na apieratyŭnaj naradzie ministr unutranych spraŭ Uładzimir Navumaŭ, ciapier pravodzicca ekśpiertyza dźviuch znojdzienych vybuchovych pryład i askołkaŭ. Ministr raźličvaje, što znachodka moža paŭpłyvać na chutkaść rasśledavańnia.
Pavodle źviestak MUS, paśla vybuchu ŭ balnicy horada byli dastaŭleny prykładna 50 čałaviek, u tym liku try — u ciažkim stanie; pryblizna 10 čałaviek paśla akazańnia pieršaj dapamohi byli adpuščany damoŭ.
U.Navumaŭ vykazaŭ upeŭnienaść u tym, što hramadski paradak padčas astatnich śviatočnych mierapryjemstvaŭ budzie zabiaśpiečany. Źmien u prahramie śviatkavańniaŭ nie budzie.
Milicyja źviarnułasia da hramadzian, jakija znachodzilisia na miescy zdareńnia i zdymali toje, što adbyvałasia, z prośbaj ab sadziejańni pravaachoŭnym orhanam u vyšuku złačyncaŭ.
Vybuch, nahadajem, adbyŭsia na skryžavańni praśpiektaŭ Mašerava i Pieramožcaŭ pryblizna a pieršaj hadzinie padčas śviatočnaha kancerta z nahody Dnia niezaležnaści. Kancert naviedała prykładna paŭmiljona čałaviek. Na miescy zdareńnia adrazu paśla vybudu pabyvaŭ prezident Alaksandr Łukašenka, jaki ŭ hety čas znachodziŭsia na kancercie, a taksama ministr unutranych spraŭ Uładzimir Navumaŭ i načalnik HUUS Minharvykankama Anatol Kulašoŭ. Niahledziačy na nadzvyčajnaje zdareńnie, kancert praciahvaŭsia.
Pa fakcie vybuchu raspačata sprava na padstavie artykuła 339 Kryminalnaha kodeksa (chulihanstva).