wyborcza.pl
Maršałak polskaha sienata Stanisłaŭ Karčeŭski na čale delehacyi naviedaje 5—6 śniežnia Biełaruś pa zaprašeńni kiraŭnika Savieta Respubliki Nacyjanalnaha schodu Michaiła Miaśnikoviča, paviedamiła 3 śniežnia pasolstva Polščy.U skład delehacyi ŭvachodziać sienatary Janina Sahatoŭska, Stanisłaŭ Hohač, Andžej Misiolek, Lešak Piachota i deputat Adam Andruškievič — sustaršynia Polska-biełaruskaj parłamienckaj hrupy.
Stanisłaŭ Karčeŭski sustreniecca ŭ Minsku z Alaksandram Łukašenkam, Michaiłam Miaśnikovičam, a taksama sa staršynioj Pałaty pradstaŭnikoŭ Uładzimiram Andrejčankam.
Śpikier sienata Polščy abmiarkuje ź biełaruskimi palitykami parłamienckaje, rehijanalnaje supracoŭnictva, pytańni małoha pamiežnaha ruchu, ekanamičnaje supracoŭnictva i raźvićcio ŭzajemadziejańnia ŭ halinie adukacyi. Jon zakranie taksama temu palakaŭ, jakija žyvuć u krainie, i abmiarkuje mahčymaść zaviaršeńnia sprečak vakoł Sajuza palakaŭ na Biełarusi, adznačajuć u pasolstvie.
Jak ukazvajuć u dyppradstaŭnictvie, vizit delehacyi sienata supadaje pa časie z ratyfikacyjaj biełaruskim parłamientam dahavora pamiž uradami Biełarusi i Polščy ŭ halinie adukacyi.
Płanujecca padpisańnie sumiesnaj zajavy ab supracoŭnictvie pamiž sienatam Polščy i Savietam Respubliki Nacyjanalnaha schodu Biełarusi.
Pavodle infarmacyi pasolstva, u chodzie vizitu projdzie sustreča z palakami, jakija žyvuć u Biełarusi, a taksama z pradstaŭnikami apazicyi.
Akramia taho, na fiłałahičnym fakultecie Biełaruskaha dziaržaŭnaha ŭniviersiteta polskaja delehacyja sustreniecca sa studentami i vykładčykami.
Polskija sienatary naviedajuć RNPC dziciačaj ankałohii, hiematałohii i imunałohii.
Delehacyja ŭšanuje pamiać achviar stalinskich represij, brackija mahiły jakich znachodziacca ŭ Kurapatach na ŭskrainie Minska.
