Učastkovy inśpiektar milicyi Maskoŭskaha RAUS Bresta asudžany na pazbaŭleńnie voli za chabar i zamach na machlarstva.
Jak paviedamiła pamočnik staršyni suda Maskoŭskaha rajona Bresta Iryna Vajciuk, u lutym učastkovy inśpiektar pravodziŭ pravierku pa zajavie hramadzianina ab prymianieńni da jaho hvałtu i paškodžańni adzieńnia. Vinavataha znajšli i pakarali ŭ administracyjnym paradku za drobnaje chulihanstva. Paśla hetaha ŭčastkovy paviedamiŭ, što parušalniku moža pahražać jašče i kryminalnaja adkaznaść, i prapanavaŭ vinavatamu, kab paźbiehnuć jaje, pieradać praź jaho słužbovym asobam pravaachoŭnych orhanaŭ 200 dołaraŭ.
U sakaviku ŭčastkovy inśpiektar atrymaŭ ad mužčyny 100 dołaraŭ i dasiahnuŭ damoŭlenaści ab pieradačy jamu paźniej astatniaj častki hrašovych srodkaŭ. Jašče 100 dołaraŭ učastkovy atrymać nie paśpieŭ, bo byŭ zatrymany.
Taksama učastkovy inśpiektar pravodziŭ pravierku pa fakcie kradziažu pakieta sa šklankami z vočki kamiery zachoŭvańnia hipiermarkieta ŭ Breście. Pa vynikach pravierki było vyrašana spynić administracyjnuju spravy za drobny kradziež z pryčyny nieŭstanaŭleńnia asoby, jakaja ŭčyniła jaho.
U dalejšym inśpiektar ustanaviŭ žančynu, jakaja ŭčyniła kradziež, i, majučy dokazy jaje viny, nasupierak intaresam słužby prapanavaŭ za chabar u 500 dołaraŭ nie pryciahvać jaje da kryminalnaj adkaznaści i nie paviedamlać na pracu.
U siaredzinie sakavika žančyna źviarnułasia ŭ hałoŭnaje ŭpraŭleńnie ŭłasnaj biaśpieki MUS RB pa Bresckaj vobłaści. 28 sakavika ŭčastkovy inśpiektar milicyi paśla atrymańnia ad jaje ŭ jakaści chabaru 500 dołaraŭ byŭ zatrymany supracoŭnikami 4-ha ŭpraŭleńnia (pa Bresckaj vobłaści) hałoŭnaha ŭpraŭleńnia ŭłasnaj biaśpieki MUS.
21 vieraśnia sud Maskoŭskaha rajona Bresta pryznaŭ učastkovaha vinavatym u padbuchtorvańni da dačy chabaru (č. 5 art. 16, č. 1 art. 431 KK), zamachu na machlarstva (č. 1 art. 14, č. 1 art. 209 KK), atrymańni chabaru paŭtorna (č. 2 art. 430 KK) i biaździejnaści słužbovaj asoby (č. 2 art. 425 KK).
Pa sukupnaści złačynstvaŭ jon byŭ pryhavorany da čatyroch hadoŭ pazbaŭleńnia voli ŭ papraŭčaj kałonii ŭzmocnienaha režymu z kanfiskacyjaj majomaści i pazbaŭleńniem prava zajmać pasady, źviazanyja z vykanańniem funkcyj pradstaŭnika ŭłady, a taksama pasady ŭ orhanach i padraździaleńniach MUS RB, źviazanyja z vykanańniem arhanizacyjna-rasparadčych abaviazkaŭ, na piać hadoŭ.
U adpaviednaści z art. 60 KK abvinavačvany pazbaŭleny śpiecyjalnaha zvańnia «lejtenant milicyi».
Abvinavačany nie abskardziŭ prysud. 15 listapada jon nabyŭ zakonnuju moc.
